Shillong, Nailur 07 : Ka Sorkar Jylla kala pyntip sha ka Meghalaya High Court ba kala pynsangeh lut ia baroh ki kam bad jingtreikam jong ka Shree Cement ha East Jaintia Hills kat bym pat pyndep ia ka Fact-Finding Committee ia ka jingtohkit.
Ha ka affidavit bala aiti sha ka division bench ka Chief Justice Revati Mohite Dere bad Justice W Diengdoh ha ka PIL bala mudui da ka Jaintia Students’ Union (JSU), ka Commissioner bad Secretary ka tnad Pohiing (Political) kong Rosetta Mary Kurbah kala iathuh ba ia kane ka rai la shim ha ka jingia lang ba long ha ka 26 tarik Nailar bad ki kynhun ba don bynta kynthup ka Khasi Students’ Union.
Ka affidavit ka ong ba ka Committee kan long kaba laitluid, ka ban khlieh da u Ophisar bala rangbah, bad kan bishar ia ki mat bala pynsngew da ka KSU ha ka dorkhas ba iadei bad ka mariang, ka imlang sahlang, ka kam ain bad ki kam bymman.
“Ka Fact-Finding Committee kan wanrah ia ka jingshai kaba bniah halor kane ka kam” ong ka affidavit.
Ka Sorkar ka ong ba ki Pulit bad ki bor district kin pynthikna ba ym dei ban don kano kano ka jingjia ha kane ka por ba iaid ka jingtohkit.
Ka nongmudui kala aiti ruh sa kawei ka affidavit ha ryngkat ki dur bad u pen drive ba kynnoh pynkhein ain ki briew Sorkar. Ka Jylla kala pan por ban jubab ia kane.
Ia kane ka mukotduma yn sa shong bishar biang ha ka 29 tarik Nailur.
