Guwahati, Nailar 07: Ka don ka jingong ba ka jingieit kam don pud, bad baroh kiei kiei ki long ki ba biang la ha kano kano ka rukom. Ia kane la pynshisha lyngba kawei ka khynnah ka ba dei napoh Sualkuchi district ka Assam.
Kane ka khynnah ka ba la kam da lade hi ba ka la ieit thep mynsiem ia la u jong u samla, ka la kheinduh ia la ka jingim na ka daw jong ka jingieit.
Kane ka khynnah kala injek ialade da ka snam u samla jong ka, u ba don ia u khniang jingpang HIV. Katkum ki khubor la iathuh ba une u samla u ba dei na Satdola ka ba ha Hajo u dei u ba don ia u khniang jingpang HIV positive bad ula poi ia ieit samla bad ka khynnah 15 snem rta ka ba dei na Sualkuchi district ka Assam lyngba ka Facebook. Hapoh ka lai snem ba ki la ia iaid, ka jingiadei jong ki ka la nang khlain kat haduh ba ym lah shuh ban pyniakhlad ia ki
Kane ka khynnah 15 snem ka la ia phet ruh bad une u samla mynta lah kumba katto katne sien, hynrei ia ka ba la wanlam biang da ki kmie ki kpa jong ka. Hynrei, ha kane ka kynti ka ba mynta ka la shim da ka sienjam ka ba kham shyrkhei ia ka ba ym shym la don ba lah ban mutdur.
Kane ka khynnah ka la shim ia ka snam na ka met jong une u samla jong ka uba don HIV positive da ka ba pyndonkam da u thyrnia injek bad dung ha la ka jong ka met.
Hadien ba kane ka khubor ka la sdang ban saphriang, na ka liang ki paidbah nongshong shnong jong ka thain ki la pynpaw ka jingkyndit ka ba khraw halor kane ka jingjia ka bym ju kham iohsngew koit.
Ha kawei pat ka bynta na ka liang ki bor pulit ka Hajo ki la kem noh ia utei u samla katba kane ka khynnah ka la don hapdeng ka jingshah khmih bniah hapoh ka jaka sumar.
