Shillong Nailar 07: Ka tnad Textiles ha ka sngi saitjain kala plie paidbah ia ka Design Innovation & Resource Centre (DIRC) ha Umden-Diwon, Raid Nongtluh, Ri-Bhoi District, ban kyntiew ia ka kam thain jain hapoh ka dong ka thain.
Ia kane ka Centre la plie da u Myntri ka Tnad Textiles Bah Banteidor Lyngdoh kum shibynta jong ka jingrakhe ia ka National Handloom Day kaba phra.
La seng iaka DIRC da kaba pynleit jingmut halor ki 4 tylli ki bynta – ban pynmih ia u Ahimsa Silk, ban aikam ia ki Kynthei (Women Centric), ban tip ka pyrthei (Global Presence) bad ka kam wiehrong ia ki jain da ki jingkhleh bym don dawai (Organic Dyes).
Haba kren kum u kongsan, u Bah Banteidor Lyngdoh u la iaroh iaka jingiohi jngai jong ka tnad Texitiles kaba la seng da ka jingthmu ban kyntiew bad ban pyninam ia ki rukom thaiñ jain kiba la leh da ki nongthaiñ jaiñ ka jylla.
U la pynpaw ia ka jingkyrmen ba ka DIRC kan long kum ka lad ban pynmih bad thain ia ki jingthaiñ kiba thymmai kiba lah ban ioh lyngba ka First Eri Silk village.
U MLA ka Nongpoh u Bah M Syiem u la ai khublei iaka DIRC bad u kyrmen skhem ba kan lah ban plie lad plie lynti ia ki nongthain jain bad ki nongwad bniah ba kin pynbha bad kyntiew shuh shuh ia ka kam thain ki jongki lyngba ki nongkhaii, ki nongpynmih jain, ki nongthain jain bad kiwei kiwei kiba iadonbynta.
Kum his bynta jong ka jingrakhe, u Myntri lem bad kiwei pat ki heh ki hain, kila ai burom bad ithuh ia ki katto katne ki jingthain kiba paw kiba la pynmih da ki kynhun kum ka Kiniho, Zong I Hi, Nangcwa, Ri Last, Sailum bad Eri Weaves halor ka jingnoh synniang ka jongki haka kam thain jaiñ haka jylla bad ban wanrah nam ruh iaka jylla da ka jingthain ia ki jaiñ kiba kyrpang.
Ha kane ka sngi la la don ruh ka jingpyni paidbah iaka jingthain jaiñ bad kum shi bynta jong ka Har Ghar Tiranga la pynher ruh iaka lama lai rong jong ka Ri ia kaba la ia shim bynta lang da ki nongthain jaiñ bad ki nongiashimbynta kiba la kaweh ia ka lama jong ka ri.
