Guwahati, Naitung 21: Saw ngut ki dkhot jong kawei ka longïing, kynthup ïa ka longkmie bad ka khun kynthei jong ka, ki la jah rngai hadien ba ki la shah rong noh ha ka umsaw ha ka shnong Abhaypuria kaba hap hapoh jong ka Tengapukhuri Police Station ha Charaideo district jong ka Assam ha ka janmiet Sngi U Blei, ha kaba ki nongshong shnong ki la kynnoh ïa ka jingpynslem jong ki bor sorkar halor kane ka jingjia ba sngewsih.
Kane ka jingjia ka la jia ha ka por 7 baje janmiet hadien ba u slap uba jur u la pynlong ïa ka jingkiew kynsan jong ka um, kaba la pynshlei ïa ki bynta kiba heh jong ka shnong.
Katkum ka jingïathuh jong ki nongshong shnong, u Rohini Dubara bad ka ïing ka sem jong u, katba ki dang pyrshang ban kynriah sha ki jaka ba kham shngaiñ, haba ka lok jong u, ka Tutumoni Dubara bad ka khun jongu, ka Bidisha Dubara, ki la shah rong noh ha ka umsaw, katba ki dang ïaid lyngba ïa ka jaka ba la shlei um.
Haba iohsngew ia ka jingpyrta jong ki ba pan jingiarap, ki arngut ki khun jong kitei ki arngut, u Bidyut Dubara bad u Biplab Dubara, ki la rynsied sha ka um kaba khlain bor bha ha ka jingpyrshang ban pyllait im ia ki. Ki ruh ki la shah rong noh ha ka jingtuid jong ka um kaba khlain bor.
Kiba ha iing ki la ïathuh ba mar mar ki la pyntip sha ki bor pynïaid district lyngba ka emergency helpline bad hadien ki la ïakynduh ïa ka Charaideo Deputy Commissioner ka Dr. Neha Yadav, uba la kular ha ki ban yn sa phah ia ka kynhun ban pyllait im.
Hynrei ki nongshong shnong ki la kynnoh ba ym shym la don ki nongpyllait im ne ka kynhun pulit kiba la poi sha katei ka jaka wat haduh ka janmiet jong ka sngi Nyngkong, kaba la pynmih ïa ka jingbitar jong ki nongshong shnong, kiba la buh jingkylli ïa ka jingpynslem ban sdang ïa ka jingwad watla ka don ka jingeh kaba kyrkieh.
Haduh ka janmiet jong ka sngi Nyngkong, baroh saw ngut ki dang jah rngai.
Kane ka jingjia ka jia ha ka por ba ka Assam ka ïakhun pyrshah ïa ka jingshlei um kaba la pur stet kaba la wan na u slap ba khlem sangeh. Ka Charaideo ka dei kawei na ki distrik kaba la shah ktah bha, ha kaba ki wah kiba tuid bad ki jingshlei um ki la pynthut ïa ka jingim kaba man ka sngi bad pynbor ïa ki hajar ngut ki briew ban mih noh na ki ïing ki sem jong ki.
