Shillong, Naitung 20 : Ka Sorkar Jylla kala sdang pyntreikam ia ka pilot project ne ka project ba shu pyrshang ban peit ia ka jingtreikam, ha ka sngi Nyngkong ban lah ratdyngkhong ia ka jingpang rabies na ka jingdait ksew ha Laitumkhrah hapoh ka “One Health”, kaba la wanrah lang ia ki kynhun na ka tnad ka koit ka khiah, ka Animal Husbandry bad ki Dorbar Shnong.
Kane ka project, bala lamkhmat da ka National Health Mission lyngba ka ingkyrshan ka Tnad ka Koit ka Khiah, ka Tnad Animal Husbandry bad ka CRE India Foundation, kan sdang naduh ka 22 tarik Naitung ha baroh ki kyntoit kiba don ha Laitumkhrah.
Ki Heh Ophisar ki pyntip ba ka jingthmu ka pynpeit jingmut eh halor ka jingai injek ia ki ksew, ka jing pynsngewthuh paidbah, ka jingpynkhlain ia ka jingpeitngor ia ka jingpang, bad ka jingdon jingkitkhlieh ki trai jong ki mrad ba ki ri khnang ba kan kynjoh ia ka thong ka pyrthei ban nym don shuh kiba iap na ka jingpang rabies hapoh u 2030.
Ka matpdeng jong ka Jylla ha kane ka campaign ka long “One Health, One Future-Together for a Rabies-Free Meghalaya”.
U Dr Paul N. Chyne, Director (MCH & FW) bad Joint MD, NHM, ula ong ba kane ka project kan khmih bniah ia ki buit treikam kum ka QR-coded collar bad digital tracking hashuwa ban pyntreikam lang ha baroh kawei ka Jylla.
U Bah David T. Sun na ka Tnad Animal Husbandry ula ban jur ia ka jingai injek bad jingpynduh khun, katba u Director ka CRE India Harish Tiwari ula buh ia ka thong ba 70% ka jingai injek ia ki ksew bad pynbna ban synniang T.1 lak.
Ka kong Valerie J. Laloo, State Nodal Officer, NHM, kala pyntip ba kane ka pilot project kan ai ia ki jinghikai na ka bynta ban pyntreikam ha baroh kawe ka Jylla.
