Shillong, Naitung 20: Ban pynkhlain ia ka jingiadei hapdeng ka kolshor bad ka kam ialehkai, ka dei ka mat kaba la pynleit jingmut ha ka jingialang hapdeng u French Consul General Thierry Morel bad u Co-Chairman ka Meghalaya State Planning Board Bah John F. Kharshiing ha French Consulate hynne ka sngi Nyngkong.
U Bah Kharshiing, uba long ruh u Working President ka Meghalaya State Olympic Association, ula iakren ia bun ki lynti ban pynkhlain ia ka jingiatreilang bad ka ri France, khamtam ha kaban kyntiew ia ka kam ialehkai bad ka jingsam jingtip mar kylliang hapdeng ki nongialehkai.
Baroh ar liang kila pynpaw ia ka jingjop jong ka Football Exchange programme ka Meghalaya bad ka club Lyon, kaba la ai jinghikai pyntbit ia ki nongialehkai kiba dang khynnah na ka jylla.
Kila mynjur ban wad ia ki lad ki lynti ban pyniar ia ki prokram ha kiwei kiwei ki jingialehkai ruh.
“Ka jingialang kala iakren ruh halor ka jingiasoi ia ka MOU hapdeng ka India-France ban iatreilang ha ki jingialehkai, kaban kynthup ia ki Coach bad ka jingphylliew jingmut kaba mar kylliang hapdeng ki nongialehkai, Sports Science, Medicine, ki jingtei bad ki jingai jinghikai pyntbit” ong u Bah Kharshiing ha ka kyrwoh.
Ula ong, ba ka Meghalaya ka lah ban iaid shakhmat halor katei ka bynta ban kyntiew ia ka jingtbit ha ka kam ialehkai ha ka jylla. Kiwei pat ki bynta ki kynthup ia ka Technical Support, ka jingiasam jingtip mar kylliang ia ki Coach, ki prokram ai jinghikai bad ka jingiatreilang bad ki jaka ai jinghikai.
U Bah Kharshiing ula iawer sngewbha ia u Morel, uba la shimti dang shen kum u Consul General ha Kolkata ban wan jngoh ia ka Shillong ban iatai sani shuh shuh halor kine ki kabu jong ka jingiatreilang.
Kane ka jingialang kala kut ha kaba baroh ar liang kila kut jingmut ban kyntiew iaka kolshor bad ia ki kam ialehkai lyngba ka jingbteng jong ka jingiatreilang.
