Shillong, Naitung 20: Ki samla pule ha ka sngi Nyngkong, kila pynlong ka jingiakhih ba jar jar ha Don Bosco, Laitumkhrah kum shi bynta jong ka jingiakhih ha ka ri baroh kawei halor ka jinglait tuh ki jingkylli ka eksamin NEET bad ka jinglong jingman ha ka pule puthi ha kaba kila ioh jingkyrshan na ka Thma U Rangli-juki (TUR) bad ka Congress.
Kane ka jingïakhih kala sdang lyngba ka jingia pynbeit na ki rynsan social media bad ka dei ruh ka jingïasnohkti lang bad ka jingiakhih u Sonam Wangchuk bad ki samla pule kiba la shah thngan ha Jantar Mantar, New Delhi kaba la iaid mynta la palat 20 sngi.
Ka nongïalam ka TUR, ka Kong Angela Rangad ruh kala ïadon bynta lang ha katei ka jingïakhih bad ka la pynpaw ba kane kadei ka jingpyni jong ki samla iaka jingsngewsih bad ka jingsngewdiaw halor ki sienjam ba shim ka Sorkar Pdeng halor ka pule puthi.
“Ka dei ka jingiakhih kaba shu jia ryngkhat. Nga shu iohi ha ki social media ba ki samla ki ong ba ngin ia kynduh ha Don Bosco Square. Ym don ba tip mano ba sdang ia kane bad baroh ki shu wan lang” la ong ka Kong Angela.
“Ka pyni ia ka jingsngewkhia jong ki samla pule bad ka jingkitkhlieh kaba ki shim hala ki tyrpeng. Shano ka Sorkar ka don bad balei ka sngap jar?” ka la kylli.
Ka Kong Angela ba ka jingbitar ka la sdang na ka jinglait tuh ki kot eksamin NEET bad kala nang jur shuh shuh namar ka jingbym shim jingkitkhlieh ka Sorkar.
“Ka jingpule ka long kaba ym lah ban ioh namar ba ka long kaba rem dor, kam dei ka jingpule kaba bha, bad halor kata phi iohi ba don u nongbishar uba pynjah burom ia ki samla pule da kaba jer kyrteng iaki samla pule kum ki ‘Niang Kalaw’. Kane ka pyni ia ka i bein jong ka Sorkar iala ki nongshong shnong” ka la ong.
Haba phai sha ka jylla Meghalaya, ka Kong Angela ka la ong ba ka Meghalaya kam lah ban shu iehnoh ia ka nam ba ka ioh haka pule puthi.
“Ngi don haka kyrdan kaba khatduh ha ka PGI index, ka jingpule jong ngi ka long kaba sniew tam ha ka ri baroh kawei, hadien jong ki jylla kum ka Bihar hynrei u Myntri Rangbah u pynbor iaki samla pule ban pyndonkam daka CM guidebook haka jaka ban wanrah daki nonghikai kiba tbit ban kyntiew iaka pule puthi” ka la ong.
“Ka jingkyntiew iaka pule puthi kam mut tang ban tei ia ki jingtei. Ban don ia ki iing kiba thylli khlem ki jingpynrung khynnah skul kam dei ba kiew ka pule dangle” ka la bynrap. Ka la ban jur ba namar ba ka jingpule ka don lang haka Sorkar Pdeng bad Sorkar Jylla, don shibun kiei kiei kiba ngi lah ban leh ha ka thain. Ki samla pule ki pyni ia ka lynti kaba ngi donkam ban sdang mynta.”
Ki nongïakhih ki la rah ïa ki plakad kiba thoh, “Ngi ieng bad ki samla ha Jantar Mantar”, “Ka jingbishar hok na ka bynta ki samla pule kiba la duh noh ia la ka jong ka jingim na ka daw ka jinglait tuh ki kot jingkylli”, “Iaki jingangnud jong ngi ym lah ban die noh”, “Ka India ka la pyn pulom ia ka lawei jong ki samla”.
Uwei u samla pule u la ong ba katei ka jingiakhih ka dei ban pynrem iaka Sorkar Pdeng bad ka Sorkar Jylla namar ka jingbym shimkhia ban kyntiew iaka pule puthi.
“Ngi don hangne ban pyrshah ia ka rukom treikam ka tnat pule pynthi jong ka ri jong ngi bad ruh na ka bynta ka Meghalaya. Mynshwa ka jylla Meghalaya ka dei kaba la paw bha haka pule dangle hynrei mynta ka la nang hiar bad kala kham sniew shuh shuh” kala ong.
Ka pynpaw ka jingsngewdiaw halor ka jingshngain jong u Sonam Wangchuk bad kiwei kiwei ki nongiakhih ha Delhi, da kaba bynrap, “Ha ka jaka ban kyrshan, ki shim pynban daki sienjam ba tyngeh pyrshah ia ki briew kiba dawa pynkylla iaka rukom treikam ka tnat pule puthi”.
Uwei pat u nongiakhih u la thew beit ba Myntri ka tnat pule puthi ka sorkar pdeng udei ban hiar shuki.
“Kumne bun ki samla pule ki la shim iala ka jingim namar ka jinglait tuh ki kot jingkylli eksamin NEET. Ka long kaba sngewsih ba ka imlang sahlang jong ngi bad ki Myntri ki dang sngap jar. Ka khubor jong nga sha u Myntri ka tnad pule puthi u Dharmendra Pradhan, sngewbha ban hiar shuki noh” ula ong.
 bad ka Congress.){kind=link}