Shillong Nailar 05: Ka East Khasi Hills District hynnin ka sngi palei kala rakhe ia ka World Day Against Human Trafficking da kaba pynlong ia ka jingialap ban pynsngewthuh halor ka lynti ban iakhun pyrshah ia ki kam khaii ia ki Khunlung khynnah.
Ia kane ka jingrakhe la pynlong ha ryngkat ka jingiatreilang bad ka National Commission for Protection of Child Rights (NCPCR) ryngkat ka Meghalaya State Commission for Protection of Child Right (MSCPCR).
Ia kane ka jingialang la pynlong ha Conference Hall jong ka ophis treikam ka Deputy Commissioner, ha kaba la iadonlang ki ADC kiba kynthup iaka Kong R.Manners bad ka Kong D. Kharshiing.
Ka Chairperson jongka MSCPCR ka Kong Iamon M. Syiem, kala ai ka jingkren kaba bniah halor ka jingdonkam ia baroh ki ophisar bad ka imlang sahlang baroh kawei ban iatreilang na ka bynta ban shimkhia iaka jingeh ha kaba iadei bad ka jingshah khaii ki khynnah bad ban ai jingpynshai ha kaba iadei bad ka hok jong ki khynnah.
Katba ka Shaista K. Shah, kaba long ka Senior Technical Expert jongka National Commission for Protection of Child Rights kala ai jingbatai ha kaba iadei bad ka phang ‘Combating Child Trafficking’ ia kaba la wan ban iashimbynta da ki dkhot jong ka Juvenile Justice Board, Child Welfare Committee, ki Officer jong ka Special Juvenile Police Unit, tnad pulit, ki Officer jong ka Border Security Force, ki Officer bad ki Staff jongka District Child Protection Unit, East Khasi Hills District, Shillong.
