Shillong, Naitung 16 : U Lat ka Jylla CH Vijayashankar ha ka sngi Balang, ula iakynduh ia ka samla Rifiness Wajri ha Raj Bhavan, ka samla ba dang khynnah tam na Meghalaya kaba la pyndep ban kiew ia u Lum Everest ha ka rta ba 20 snem.
Ka samla Rifiness, kaba pule ha St.Anthony’s College bad ka dkhot NCC, kala pyndep ban kiew ia une u lum ba jrong tam ka pyrthei ha ka 18 tarik Jymmang, 2025, bad ka dei ruh ka kynthei kaba lai na Jylla ban poi sha kliar jong une u lum.
Ha kane ka jingiakynduh, ka samla Rifiness kala pyni ia ka jinglah jong kaban leh bun ki kam da kaba rwai ia artylli ki jingrwai-ka jingrwai ieid ri bad ka jingrwai Khasi ba pynkhih mynsiem- kaba la pynshoh ia u Lat ka Jylla.
U Lat ula khot sngewbha ia ka Rifiness ba kan rwai ha ka sngi rakhe ia ka Independence Day ha Raj Bhavan, haba ithuh ia ka kum ka nuksa iaki samla, khamtam ki khynnah kynthei kiba wan na ki longiing ba sngewrit.
Ula pynpaw ba ka samla Rifiness kala pyni ia ka mynsiem jong ka jingkut jingmut bad ka jingsarong hala ka jong ka kolshor. Ka jingdon jong ka ha ka jingrakhe Independence Day kan dei ka synniang ia ka jingai mynsiem jong ka sha ki samla ki bym lah ban niew ha kylleng ka Jylla.
Haba kyntait ban shongthait noh na kane ka kam, kane ka Samla ka don ia ka jingangnud ban kiew pyndep sa ia 7 tylli ki lum- ki lum ba jrong tam ha baroh 7 tylli ki dewiong-kynthup ia u lum Denali, Kilimanjora bad Vinson Massif.
Ka jingjop jong ka samla Rifiness kala ioh ia ka jingpynkup burom na ki riewpawkhmat kynthup na u Myntri Rangbah ka Jylla Conrad K Sangma bad u Myntri kam iada ri Rajnath Singh.
