Shillong, Naitung 16 : Ka Iingkashari Meghalaya High Court, kala pynkylla ia ka hukum ba hashuwa da kaba ai khambun ka por ia ki nongshong dukan madan ba kin buh ia ki dukan bad ban lum noh ia ki hapoh ka por ba buh ha ka thain Khyndailad.
Ka rai jong ka Iingkashari kaa mih haba jubab ia ka aplikeshon bala mudui da ka Meghalaya and Greater Shillong Progressive Hawkers and Street Vendors Association.
Ka Iingkashari kala pynjlan ia ka por shong dukan madan, kaba ailad ia ki briew ba kin buh ia ki dukan naduh ka por 12 baje mynsngi haduh 2:15 baje janmiet bad naduh ka por 7 baje janmiet haduh 9:15 baje mynmiet.
Hadien ba shong bishar ia ka PIL ha ka sngi Balang, ka Division Bench ba kynthup ia u Chief Justice IP Mukerji bad Justice W Diengdoh kala ong “Haba shimkhia ia kine ki jingiasaid ba marpyrshah, ngi pynkylla noh ia ka hukum jong ngi ba 3 tarik Naitung 2025, da kaba ai kham bun ka por ba shiteng kynta bad khatsan minit ha ka por shong dukan madan janmiet ba kin buh ia ki dukan bad ba kin lum pat ia ki bad kane ka jingaipor kan treikam ruh ha ki kynta shong dukan mynmiet”.
“Ha kawei pat ka kyntien, ki nongshong dukan madan kin iohlad ban sdang pynieng ia ki dukan naduh 12 baje mynsngi bad sdang lum pat naduh 2 baje janmiet haduh 2:15 baje janmiet….bad sa sdang buh biang ia ki dukan ha ka por 7 baje mynmiet bad lum pat hapoh ka por 9:15 baje mynmiet” kala bynrap.
Ka Iingkashari kala bthah ba ia kine ki kynta thymmai ban shong dukan madan dei ban pyntreikam hapoh ka jingpyniaid ba pyrrkhing jong ki bor Sorkar bad u Special Officer.
Nalor kane, ka Tnad Traffic ka dei ruh ban buh kham bun ki Pulit pyniaid kali ba kin pyniaid ia ki kali ha ka thain ha kine ki kynta shong dukan madan bala pynjlan.
