Nongstoiñ, Rymphang 21: Ki paid Nongshongshnong ka thain Riangpoit Thymmai kynthup ki kynhun Sengbha lang, hynne ka sngi kila iaid paidbah hapoh kane ka shnong ban pynrem jur ia uwei u runar uba pyniap dusmon ia kawei ka Longkmie hadien ka jingleh beijot.
Une u runar ula pyniap ia kane ka Longkmie bala tip kyrteng ka Kong Matilda Lyngdoh, ha ka 14 tarik mynta u bnai katba ka dang mih nala iing bad leit sha kawei ka jaka thang rnga kaba don ha khlaw jong kane hi ka shnong. Kane ka longkmie kala don 5 ngut ki Khun.
Ki paid nongshongshnong naka thain naduh ka shnong Risiang, Nongtraw, Mawlait, Riangpoit, Maweitksar bad kiwei kiwei, kila mih paidbah ban pynrem ia kane ka kam pyntriem jong une u runar haba dawa ruh ia ki bor ka Ain ban set phatok shirta jingim ia une u briew.
Ia kane ka jingiaid paidbah la sdang naduh narud shnong jon gka Riangpoit haduh ban da poi ha madan jong ka skul. Da ki spah ngut ki paidbah naduh ki longkmie, ki rangbah, ki samla bad ki khynnah skul ki la wan ban ïashim bynta bad ban pyrta da kawei ka sur ban dawa ba ki bor ka aiñ ki dei ban pynshitom da kaba tyngeh ïa u riew runar.
