Shillong, Rymphang 21 : U Nongialam ka Congress bad Myntri barim ka Sorkar Pdeng Sachin Pilot, hynne ka sngi ba-ar, ula ong ba ka BJP mynta kala pynpaw pyrthei da kaba shai kdar ba kam shym la lah satia ban ai ka jingshakri watla kala kam ba ka pyniaid ia ka sorkar double-engine ha Meghalaya.
Haba iakren bad ki nongthoh khubor, u Pilot ula ong “ BJP kala pynpaw pyrthei shisha. Ki don ha ka bor ha Delhi bad iatreilang ha Meghalaya kaba ki niew kum ka sorkar double engine hynrei ki khlem lah satia ban ai ka jingshakri”.
Haba pynpaw ba ka jingkiew dor ki mar ki mata, ka jingbym iohkam ka dang iai bteng kum kawei ka jingeh ha ka Jylla bad ka Ri, ula buh jingkylli “Kaei kaba khang ia ka BJP bad ka Sorkar MDA ban leh eiei halor kine ki jingeh? Kaei kaba khang ia ki ban pynkha ia bun ki karkhana, ki karkhana shna jingshna bad thaw kam thaw jam ha Jylla Meghalaya?”.
Ula kynnoh ba ka BJP bad ka NPP ki shu kwah tang ban don ha ka bor bad ong “Hynrei nga sngewskhem ba ki paidbah ka Meghalaya ki iohi lut ia kine kiei kiei bad ki tip bha bad ki dei kiba shemphang ban pyndonkam ia ka jingstad ha ka 27 tarik u Rymphang”.
Ula kam “Da kaba iaid kat kum ki jingtreikam jong ngi ha Jylla bad ha ka Sorkar Pdeng, ngi la pynrulong beit ia kiei kiba la kular. Ngi la kut jingmut ban pynurlong ia kaei kaba la kular ha ka manifesto”.
Haba pynpaw ba ka Congress kala pynieng ia ki kyrtong ba dang khynnah bad ba dang thymmai kynthup ruh ia ki kynthei, u Pilot ula pynpaw ia ka jingsngewskhem bad ong “kane ka kynhun ki riew thymmai hapoh ka jingialam u ma Vincent H Paka kan wanrah ia ka sorkar kaba treikam bha hapoh ka Jylla. Ka Congress ka plie lad ia ki samla kumba iohi na ki 47 ngut ki kyrtong kiba iakhun na ka congress party”.
Haba kdew ia ka jingkyrduh kam kyrduh jam jong ki samla, une u Myntri barim ula ong ba ka Sorkar MDA bad ka BJP kaba iatreulang, ki hap ban ai shibun ki jubab ia ki paidbah ka Jylla halor ka jingbun ki samla ba khlem kam khlem jam hapoh ka Jylla.
