Hiar leit jngoh u Myntri bad ki Ophisar ka Tourism ia ka krem Lymbit ha Pnah Kyndeng

Hiar leit jngoh u Myntri bad ki Ophisar ka Tourism ia ka krem Lymbit ha Pnah Kyndeng

Nongpoh, Rymphang 10: Ka Jylla Meghalaya ka don kyrhai ka spah mariang kiba la mariang ka dang buhrieh (bym pat poi briew) hynrei suki suki kine ki spah kila nang paw pyrthei katba nang iaid ka por bad kawei na kiba la sdang paw bha mynta ka dei ka krem Lymbit kaba don ha u Lum Pnah Kyndeng-ka Lawkyntang jong ka Shnong Pahamskhen, Ri-Bhoi District.

Kane ka krem Lymbit ka dei kawei na ki jaka kaba la khring bha ia ki briew kiba sngewtynnad ban leit pynlut por bad ka mariang bad ruh ki briew kiba kwah ban iohi bad tip bad kiba wad bniah shaphang ki Lymbit bad ki jaka sah jong ki.

Kum ka jingpyrshang ban pynpaw pyrthei ia ka jingitynnad jong kane ka krem bad ban kyntiew ia kane ka jaka-kaba dei ka Lawkyntang, kum kawei na ki jaka jngohkai, ka Ri-Bhoi Tourism Development Forum (RBT&DF) hynne ka sngi Saitjain kala pynlong ia ka trekking ne ka jingiaid kjat sha une u Lumkyntang-kaba la sdang na ka shnong Pahambir haduh Lum Pnah Kyndeng-kaba jngai kumba 5 Kilometer.

Ha kane ka trekking la wan ban iashimbynta lang u Ophisar ka Tnad Tourism Bah Bansynsharlang Khongwir, ki Nongialam ka RBT&DF ba kynthup ia u Chairman Bah Plielad Tiewsoh , ki Nongthoh khubor nalor ki riew paidbah ka thain.

U Myntri ka Tnad Tourism Bah Paul Lyngdoh uba la leit ban long kongsan ha kane ka prokram, ula leit dalade ha ryngkat bad u MLA ka Nongpoh, ban leit jngoh ia ka Krem kaba shong ba sah da ki hajar tylli ki sim Lymbit mynta da ki phew phew snem ha kane ka krem jong ka Law Kyntang Pnah Kyndeng.

U Myntri ula pynpaw ia ka jingkmen ban ioh sakhi dala ki khmat ia kane ka Law Kyntang bad ia ka krem Lymbit bad ula ai ka jingiaroh ia ka RBTDF kaba la shimkhia ban pynpaw pyrthei ia kane ka jaka ba kan long kum kawei na ki jaka jngohkai hapoh Ri-Bhoi District.

U Bah Mayral Born Syiem u la ai ia ka jingiaroh ia ki nongialam ka RBTDF kiba la shimkhia ban kyntiew ia ki jaka jngohkai pyrthei kiba don hapoh ka them Ri Bhoi District khamtam ia u Lum Kyntang Pnah Kyndeng u ba don ruh ia ka krem Lymbit kaba la bna-nam hapoh ka shnong Pahamskhen.

Ula ong bad ka jingshimkhia u Myntri ka tnat Tourism bad u Director lem ki ophisar ban wan jngoh hi dalade ia ka jingitynnad bad ka jinglong kyrpang jong kane ka krem ka dei kaba ai mynsiem ban pynlong ia kane ka jaka kaba bna nam kum ka jaka jngohkai.