Shillong, Rymphang 10 : U Myntri Rangbah ka Jylla Conrad K Sangma ula plie ia ka MegFarm Processing Hub bad ka Tikrikilla Prime Hub ha Khamari, Tikrikilla, West Garo Hills ha ka jingiadonlang u Myntri bording AT Mondol, MP ka Lok Sabha Agatha K Sangma bad kiwei kiwei.
Haba ai jingkren ha ka jingialang, u Myntri Rangbah ula ong ba ka jingbret kai ia ki mar rep kala wanrah ia ka jingduhnong kaba khraw bha ia ki paid nongrep ka Ri-Lum Garo.
“Ka MeghFarm Processing Hub kaba lah ban thep kumba 80 haduh 100 metric ton ki marrep kan pynthikna ia ka jinglah ban pynneh bad tyngkai ia ka jingplung ki marrep, pynjlan ia ka por ban nym jlop bad kyntiew ia ka dor” ula ong bad pyntip ba ia kane ka project la tei ha ka jinglut ba T.14.5 klur.
Ula ong ba da ka jingthaw ia ka MeghFarm hapo ka thain, kan sa wanrah ia ka jingkylla ia ka ioh ka kot jong palat 10,000 ki nongrep bad kyntiew ia ka rukom im ka jong ki.
Ula ong ki cold storage bad processing plant ha ki jaka nongkyndong kala plie ia ka lad ia ki nongrep ban nang ioh shibun ki jingmyntoi na ki marrep ba ki pynmih bad pynduna shibun ia ka jingbret kai ia ki.
“Ngi don jingthmu ban buhn haduh 50 tylli ki MeghFarm Processing Unit bad PRIME Hub ha baroh ki Block jong ka Jylla ban pynkhlain ia ka jingpynmih marrep hapoh ka Jylla” ula ong bad bynrap ba ki sohtrun, sohphan, bad ki sohniamta kiba pher tam ka Ri-lum Garo, kin nang heh duh shuh shuh namar ki mar ba pynmih na ki, ki dei kiba jurka jingdawa ha ki iew ka pyrthei.
Haba iohi ia ka jingjop bad ka jingtrei shitom jong ki Cooperatives ha ka Jylla, u Myntri Rangbah u pyntip ba ka Sorkar kan sa shna kumba 300 tylli ki mini-processing bad mini-cild storage unit ha kylleng ka Jylla. Kane kan iarap shibun eh ia ka jingmyntoi jong ki cooperative society kiba la treikam bha.
Ha kane ka sngi, u Myntri Rangbah bad ki kynrem ki lyndan kila sam ruh ia ka khusnam sha ki Cooperative Society jong ka Tikrikilla Block.
Hapoh ka Community Investment Fund, ka Sorkar kala aiti haduh T. 1.23 klur sha ki 16 tylli ki Village Organisation.
