Shillong, Risaw 01: U Chairman ka 16th Finance Commission Arvind Panagariya, ha ka sngi Ba-ar, ula iuhkhat bad rung peitkai ia ka Law Kyntang jong ka Hima Mawphlang bad leit iuhkjat ruh hapoh ka Khasi Heritage Village jong ka Khasi Hills Autonomous District Council-ka jaka ba ju pynlong ia ka Monolith Festival.
Ia une u Khliehduh ka Finance Commission la synran da u Chief Executive Member ka KHADC Bah Pyniaid Sing Syiem, u Chairman ka KHADC Bah Lamphang Blah, ki Executive Member ka KHADC lem bad kiwei kiwei.
Haba iakren bad ki nongthoh khubor, u Arvind Panagariya ula iaroh ia ka jingitynnad jong ka Mawphlang bad ki sawdong sawkun jong ka bad kyrmen skhem ba shisien ka sngi, un sa wan ialam lang ia ki Khun sha Mawphlang bad leit jngohkai ruh ia ka Sohra nalor kiwei kiwei ki thain jong ka Jylla.
Ula pynpaw ba mynta ka Meghalaya ka dei ka Jylla kaba u itynnnad eh bad kwah eh ban wan.
U CEM ka KHADC ula pynpaw ba kane ka jingwan iuhkjat jong u Chairman ka Finance Commission ha Mawphlang kan long ka jingkyrkhu kaba khraw bha khamtam ba ka KHADC kala pan ia ka mang tyngka na ka Commission ban kyntiew ia ka kolshor bad ka kam jngohkai mariang ne eco-tourism.
