Shillong, Risaw 01 : Ka Tnad Excise ka Jylla kala buh ia ka thong ban pynmih khajna ia palat T.500 klur ha une u snem mang tyngka ba mynta haba pynkhreh ruh ban pyntreikam noh ia ka QR code ban buddien ia ka jingiaid lynti ki mar khnang ban tehlakam ia ka jinglait ei ki khajna da 5 haduh 10%.
Haba iakren bad ki nongthoh khubor ha ka sngi Ba-ar, u Myntri ka tnad Excise Bah Kyrmen Shylla ula ong “Ka jingpynmih khajna jong ngi kala nang kiew manla u snem. Mynta u snem, ka thong jong ngi ka long ban phnmih ia ka khajna ba T. 500 klur tam. Kane kan dei ka synniang jong ngi sha ka Sorkar”.
U Bah Kyrmen ula pyntip ruh ba ka Tnad ka dang pynkhreh shaid shaid ban pyntreikam ia ka QR code ka ban buddien ia ka jingiaid lynti ki mar khnang ban nang pynjanai ia ka jinglum khajna. Kat kum ka jingong jong u, ka jingpyndep ia ki kam ba donkam na ka bynta kane, ka lah ban shimpor hapdeng ar haduh lai bnai.
“Haba phai sha ki holograms, ka por kala kut ia ki. Ban pyntreikam ia ka QR code ka don ka lynti iaid kaba hap ban leh. Kumta namar kane ngi la aipor shuh shuh ia ki naba ngim lah ban pyllait ia ka mar ban poi sha iew khlem da lah ban buddien. Kumba long mynta, ka jingbuddien ia ka mar kaba ngi don ha dei ka hologram. Ngi la pynjlan ia ka por sah ka kompani kiba pynpoi ia ki hologram hynrei ka dei tang haduh ban da pyntreikam ia ka QR code”.
Haba kylli, u Myntri ula pyntip ba ka Tnad ka khlem pat pynkiew dor satia ia ki mar bad ha ka jingshisha, ka dor jong ki mar mynta ka dang duna ban ia ka dor bala buh da ka Assam.
