Shillong, Risaw 01 : U Myntri ka Tnad Excise Bah Kyrmen Shylla ha ka sngi Ba-ar, ula ong ba ka Sorkar Jylla ka kwah ban pynlong ia ka Meghalaya kum kawei na ki Jylla ba pynmih bun eh ia ki wain soh hapoh ka thain.
“Ngi kwah ban pynbun ia ka jingpynmih wain bad ngi kwah ban pynlong ia ka Jylla jong ngi kum ka jaka pynmih wain soh kaba bun eh. Kane kan shim katto katne por” ong u Bah Kyrmen haba iakren bad ki nongthoh khubor.
“Hynrei ka long kaba itynnad ban peit ia ki nongrep jong ngi, kiba ju bret mynshuwa ia ki soh namar ba kim lah die hynrei mynta kila pyndonkam ia ki ban shna wain. Kane ka dei ka jingkylla kaba khraw bad ka jingiohnong kaba bun ia ki” ula bynrap.
U Myntri ula pyntip ruh ba ia mynta, ka tnad kala ai ka jingkyrshan ia ki nongshna wain da kaba ai ia ka jaka ba kin ioh jing hikai kumno ban shna wain.
“Ngi la ai ha ki ia kane ka jingkyrshan hynrei kam pat biang satia namar ngi donkam ban nang pynbun ia ka jingpynmih wain” ong u Bah Kyrmen.
La ka Sorkar ka don jingthmu ban ithuh noh da ka ain ia ki nongshna kyiad pyrsi, u Myntri ula ong “Kaei ka lynti ban iaid shakhmat, ngam lah ban ong eiei. Ka daw ka long ba ia ka kyiad la shna na u khaw bad kumta ia mynta ngi tip ba u khaw u dei u jingbam ba hakhmat eh ba ngi bam hangne…kumta ngam lah ban ong eiei”.
Ula ban jur ruh ia ka jingdonkam ban pynlong ia ka jingwadbniah halor kane ka sobjek hashuwa ba ka Sorkar kan shim ia kum kane ka rai.
