Shillong, Naitung 16 : U Myntri kam Jngohkai Bah Paul Lyngdoh ha ka sngi Balang, ula leit iuhkjat hapoh ka Kupli Orchid Resort ha shnong Priang, West Jaintia Hills, kum shibynta na ka jingleit jurip ia ki jingtei kam jngohkai ba pyniaid da ka Sorkar ha kylleng ka Jylla.
Ia u Myntri la synran da u MLA ka thain Bah Nujorki Sungoh bad ka Director ka Tnad Jngohkai Brenda Pakyntein.
Ha kne ka jingjurip, u Myntri ula shonglieng ha kane ka resort ban peitthuh ia ki lah ban kyntiew ia ki kam jngohkai hapoh ka Wah Kupli bad ula ioh iakren iakhana ruh bad ki trai shnong.
Ka kynhun na ka Synjuk ki Waheh Shnong Iooski- Saphai Circle kila aiti ia ka dorkhas ba kyntu ia ka Sorkar ban pynroi ia ki kam jngohkai ha ki 13 tylli ki Shnong kiba hap hapoh ka Chutwakhu-Saphai Corridor. Kila tyrwa ban pynbna ia kine ki shnong kum ki Tourism Zone.
Ka Synjuk kala ban jur ruh halor ka jingdonkam ban pynkhuid bad pynim biang ia ka Wah Kupli ban kyntiew ia ki kam jngohkai mariang bad ban pynneh pynsah ia ka sawdong sawkun. Kila kyrpad ruh ban pynroi ia ka water sports bad kiwei kiwei ki kam jngohkai ha shilynter jong kane ka wah.
Ka Kupli Orchid Resort ka dei ka project bala pyntrei da ka Tnad Jngohkai ka Jylla da ka jingthmu ban kyntiew ia ki kam jngohkai ha nongkyndong bad ka mariang hapoh ka thain.
