Nongstoin, Naiwieng 28 : Ka jinglynshop jong ki bor mariang ha une u snem 2024 naduh u slap haduh u phria, kala pynhiar arsut ia ka jingioh lum kba ki nongrep ha baroh ki jaka jong ka West Khasi Hills District.
Ia kane la pyntip da ka seng Hill Farmers Union (HFU)-West Khasi Hills lyngba u General Secretary Lumlang Kharsyiemlieh.
Ula ong ba ha ka jinglum jingkhein jong ka seng, ki nongrep kiba ju ioh lum kba haduh 20-30 byrni, mynta kila ioh ban lum tang 8-9 byrni haduh 13 byrni eh.
U ong ba ka rukom wan u slap bad ka jingtyrkhong slap mynta u snem kala ktah bha ia kiba rep kba namar ka jingwan u slap bad ka jingrang ka bneng kam iahap bad ka por ka jingsan u kba bad ha ka por ba un ih artad, wan lynshop sa u phria, uba la pynjulor laki laka hapoh ka District.
Une u Nongialam ka HFU ula kyrpad ia ka Sorkar Jylla ba kan ai noh ia ka song jingiarap ne ka Relief Fund ba ju sam da ka Ophis u Deputy Commissioner sha ki nongrep kiba shah ktah na ka jinglynshop u phria kumba la pyntip da ka District Agriculture Officer ka WKH.
