Shillong, Naitung 29 : Ka Raid Laban Sports, Social and Cultural Organisation kala pynbna ba kan pynlong ia ka jingsam ia ka khusnam sha ki khynnah pule kiba wan shakhmat ha ki jingpule, ia kaba la tip kum ka 23rd Meritorious Award for Students 2026.
Ka RLSSCO kala pyntip ba kane ka jingai khusnam kan dei na ka bynta ki khynnah bad ki samla pule kiba wan shakhmat ha ka eksamin X bad XII jongka SSLC/HSSLC/ICSE/CBSE/ISC/NIOS bad kiwei kiwei na ka bynta u snem 2025-26, ban kan dei na ka bynta kito kiba ioh ia ka 1st Division shaneng bad kan dei ruh tang na ka bynta kito kiba shong basah hapoh jong ka 19th South Shillong Constituency.
La pyntip ruh ba ia katei ka khusnam yn ai ruh sha kito kiba don jingduna ha ki dkhot met, kiba wan na ki longiing kiba duk kiba la wan shakhmat ha ki jingpule ha kino kino ki Division.
Ka RLSSCO kala kyntu ia ki khynnah pule ba kin leit shim ia ki phom na ka ophis jong ka seng kaba don ha ka mala kaba shapoh ne Ground Floor jong ka iingsah u MLA u Bah Sanbor Shullai uba long u President ka seng, kaba don ha New Kench’s Trace, Shillong-4, naduh ka por 9 baje mynstep haduh 12 baje mynsngi bad ka jingsam ia ki phom kan long naduh ka 30 tarik u Naitung haduh ka 10 tarik u Nailar 2026.
