Shillong, Naitung 30: Ka Meghalaya Rural Tourism Forum (MTRF) ka la thoh sha u Myntri ka tnad Tourism u Timothy D Shira ban wanrah daka ain ba mana ïa ki nongjngohkai pyrthei ba kin shet bam ha ki jaka paidbah, haba pynpaw ba kane ka jingleh jong ki ka pynjaboh ïa ki jaka ba itynnad ka Jylla bad ka pynduhnong ïa ki kam khaii pateng jong ki trai Jylla khamtam ki dukan bam lane ki Restaurant.
Ha ka shithi ba la aiti ha u Myntri ka tnat Tourism, u President ka MRTF bah Alan West Kharkongor u la ong ba ka Jylla ka la sakhi ia ka jingkiew stet ha ka jingwan ki nongshangkai pyrthei kiba kham bun na ki jylla ba marjan, kiba poi ryngkat bad ki tiar shet, ki marbam ban iashet bam.
Ha ka jaka ban pyndonkam ia ki jaka bam bad ki jaka sah lane ki Restaurant kiba don ha kane ka Jylla, kine ki nongwan shangkai pyrthei ki pynkylla pynban ia ki rud surok, ki rud wah, ki jaka peitkai bad kiwei kiwei ki jaka paidbah kum ki jaka shet jingbam lane ki (Picnic Spot) ba shipor.
Ka Forum kala ong ba kane ka jingleh ki nongwan shangkai pyrthei kala wanrah pynban iaka jingjyllei jong ki jaboh, kum ki pliang plastic, ki bilor bad ki tiar ba lah ban pyndonkam tang shisien kaba pynsniew ïa ki jaka ba ka Meghalaya ka pawnam bha namar ka jingkyrkhu ka mei mariang.
Ia kane ka jingleh ki nongwan shangkai pyrthei, la sei madan ka jingialang hapdeng ka Federation of Shillong Hotels, Tour Operators Association of Meghalaya, Tour Guides Association of Meghalaya, ki Transport Operators, Clean Sohra Campaign bad ka Hima Sohra Tourist Assistance Team.
Ka Forum ka la mynjur ba donkam ia ka jingtuklar jong ka Sorkar ban iada ia ka mariang bad ia ka kamai kajih jong ki paidbah kiba im naka kam jngohkai pyrthei.
U bah Alan West u la kyntu ia ka tnat Tourism ba kan pynmih ia ka jingpynbna ha ka jylla baroh kawei kaba mana ban shet jingshet ha ki jaka paidbah bad ha rud surok, bad ban pynthikna ba kan poi sha ki nongwan jngohkai shwa ba kin rung sha ka Jylla Meghalaya.
U la ai jingmut ban pynbna paidbah lyngba ki lad pathai khubor, ka jingpyni paidbah haki hotel, Resort, ki Kali, bad ka jingpynphriang ha kylleng ki website jong ka Directorate of Tourism bad haki rynsan Social Media.
Ka Forum ka la pan ruh ka jingiatreilang hapdeng ki nongpynphriang (Influencer) ban ialap halor kane ka rai.
Kala ai jingmut ban buh ia ki jingthoh shnong shwa ban rung shapoh ka Jylla kum ha Byrnihat bad Nongpoh, bad ha kiwei kiwei ki jaka jngohkai ba khring bun ki briew.
Ka la tyrwa ban iatreilang bad ki nongshong shnong, ki seng treimon sngewbha bad ki kynhun ba khmih iaka kam jngohkai pyrthei ban pynphriang ïa ka jingtip bad ban kyntiew ïa ka jingbud ryntih iaka jing mana.
Ka Forum ka la pynpaw ruh ïa ka jingdonkam ban don ïa ki lad ban weng iaki jaboh ha kylleng ki jaka jngohkai pyrthei kiba mih na ka jingwan ki nongwan jngohkai pyrthei.
Nalor kane ka MRTF ka la pan jingtip na u Myntri halor ki jinglap jong ka Committee ba la thaw bun snem mynshwa ban peit bniah ïa ki jingeh ba la pynpaw da ki nongpynïaid kali trai Jylla.
Haba batai ia ki lad ki lynti kum kiba donkam na ka bynta ka kam jngohkai pyrthei, u Bah Alan West u la ong ba kin iarap ban iada ia ka mariang jong ka Meghalaya bad ban pynneh ia ka nam jong ka Jylla kum ka Jylla jaka kaba khuid tam.
