Shillong, Naiwieng 11: U nongialam ka Raijor Dal uba dei ruh u MLA ka Sivasagar constituency u Akhil Gogoi u la kynnoh ba u Myntri Rangbah ka Jylla Assam u Himanta Biswa Sarma u kyrshan ia ka kynhun runar kaba la kynnoh donkti ban shalan dewiong na Upper Assam bad ki jylla ba marjan sha Meghalaya, da kaba kam ba u Himanta udei u u “Mafia Raja” ka jylla.
Haba kren ha ki nongthoh khubor u Gogoi u la kynnoh ba ki network khaii be-aiñ ki treikam ha kylleng ka Assam haka jingshalan ïa u dewïong, kwai bad masi.
U Gogoi ula kynnoh ba ki kam khaii beain ki iaid da ka jingkyrshan jong ka Sorkar jylla.
“Mynta, ka Mafia Raj kaba treikam be-aiñ ka ïaid ha Assam, dei na kata ka daw ba ha kine ki sngi nga jer kyrteng ïa u Myntri Rangbah ka Assam kum u ‘Mafia Raja’,” ong u Gogoi.
U Gogoi ula kynnoh ba ki kynhun syndicate ki donkti ban shalan beain ia u dewiong na Arunachal Pradesh, Meghalaya bad Nagaland, nalor ka jingkhaii beain ia u kwai bala wankit na na ki ri South Asia bad ki masi.
“U Myntri Rangbah ka Assam u Himanta Biswa Sarma u la kylla long mynta u ‘Mafia Raja’ bad u pyniaid ia ka kam khaii dewiong beain na Arunachal Pradesh, Meghalaya bad Nagaland. U pyniaid ia ka kam khaii kwai na South Asia, bad wat la ki kam ba ki dei ki Hindutvadi, kine ki briew ki shim pisa bha naka kam khaii masi” ula kynnoh.
U Gogoi ula kynnoh shuh shuh ba ka Sorkar Pdeng ka la ioh jingtip halor ki kam beain ba la kynnoh bad ba katto katne tylli ki kali ba la suba ba ki donkti ha katei ka kam khaii ki la shah pynsangeh ha khappud Assam-West Bengal.
U la kynthoh ruh ïa u Myntri Rangbah ka Jylla ba um shym la leh eiei wat hapdeng ka jingujor bunsien sha u bad sha Director General of Police (DGP) ban bat ïa ki kali ba la kynnoh ba kit dewïong beaiñ.
Katkum ka jingong u Gogoi, ym duna ia ka 30 tylli ki kali kit dewiong ki la shah bat hadien ka jingkynnoh ba ki thmu ban kit ia u dewiong da ka rel na Upper Assam bad Tuli station ha Nagaland sha ka jylla Meghalaya.
Hynrei u la kynnoh ba ha ka jaka ban kurup ia ki kali, ki pulit ki la pynbiang ia ka jingpahara ia ki bad synran sha Meghalaya.
U Gogoi u la jer kyrteng ruh ia u MLA u Jayanta Malla, u Bolin Chetia bad u Bhaskar Sharma, da kaba kynnoh ba ki donkti ban pynsuk ia ka jingkhaii dewiong lyngba ka lynti rel.
“Ngi la ioh bat ym duna ia ka 30 tylli ki kali kiba kit dewiong beain, hynrei u Myntri Rangbah ka Jylla um shym leh eiei, nga la ong bunsien ia u Myntri Rangbah ka Jylla bad ia u DGP ban bat ia kine ki trok kit dewiong beain, hynrei ha ka jaka ba kin bat ki la pynbiang ia ka jingpahara pulit ban synran ia ki trok shaduh al Meghaladya” u la ong.
Da kaba pyniadei ia katei ka jingkynnoh baka jingdon ki syndicate ka wanrah ka jingkiew dor jong ki marbam bad ki mar mata, u nongialam ka Raijor Dal u la kynnoh baka Sorkar kadei ban shim ia ka jingkitkhlieh namar ka ailad ia kum kine ki kam beain ban bteng bad dawa ban pynkut noh mardor ia kaei kaba u khot “mafia raj” bad “syndicate raj” ha Assam.
U la maham ba lada ka sorkar kam lah ban shimkhia, un sa ai ia ka jingthoh sha u myntri rangbahduh ka ri, u Narendra Modi bad u myntri kam poh iing sorkar pdeng, u Amit Shah, hapoh kine ki ar sngi ban wan ban phah tuklar.
