Pyndep ka Meghalaya ia ka SIR, don baroh 23,49,645 ngut ki nongthep vote

Shillong Naitung 30: Ka jingleh ia ka Special Intensive Revision (SIR), 2026 ha ka jylla Meghalaya kala kut noh hynne ka sngi Palei, ha kaba kala kot sha ka 100% jong ka jingpynrung kyrteng ki nongthep vote kiba don baroh 23,49,645 kiba la aiti ia ki phom ki jongki sha ka tnad Election jong ka jylla.

Ka Office jongu Chief Electoral Officer, Meghalaya, kala pynbna ba la pyndep ia ka jingleit rung ha man la ki iing ki sem ha kylleng ki bynta jong ka jylla Meghalaya ban pyndep ia ka Special Intensive Revision (SIR), 2026, da ka jingthmu ban shim ia ka sienjam ban pynkhreh ia ka jingkhuid, jingbeit ryntih bad ka Electoral Roll kaba salonsar ha ka jylla.

“Haduh ka 30 tarik u Naitung, 100% jong ki nongthep vote ha ka jylla kaba kynthup ia ki 23,49,645 ngut kadei kaba lah dep ban kynthup ia kitei ki 23,49,645 ngut, ha kaba la sam ia ki Enumeration Form bad la pynrung kyrteng ruh lyngba ka kor Digital, kaba pyni ia ka jingtrei shitom bad ka jingdon ia ka jingiatreilang bad ki bor pyniaid elekshon ha ka jylla.

Kila don baroh 23,49,645 ngut ki nongthep vote ha ka jylla, ia ki phom kiba la sam bad la pynrung da ka Digital ki long 23,49,645 ngut (100%), ha kaba ki don 7,75,337 ki nongthep vote (33.00%) kiba lah dep ban shah Mapped kum dalade bad la dep ban pyniasoh da kaba seisoh ia ka electoral record ka jongki bad ka Special Intensive Revision (SIR) 2005 database.

Kila don 11,69,670 ngut ki nongthep vote (49.78%) kiba la shah Mapped kum ki Progeny bad ia ki rekod ki jongki lah dep ban pyniasoh bad ka electoral record jong ki kmie ki kpa, ne ki kmieid kpaieid kiba la don ha Special Intensive Revision (SIR), 2005 database.

Kila don baroh 2,24,234 ngut ki nongthep vote (9.54%) ki bym shim la lah ban pyniasoh bad ki Record jongka Special Intensive Revision (SIR), 2005 bad la pynhap noh ia ki ha ka kyrdan “No Mapping”. Ia kum kine yn dang hap ban pynshisha ha ka Notice Phase, kynthup ia ka por ban pyndep ia ka Claims and Objections, kaban long ha ka 5 tarik u Nailar haduh ka 3 tarik u Risaw 2026, kaban iaid katkum ki kyndon jong ka Registration of Electors Rules, 1960 bad ki jingbthah jongka Election Commission of India. Ha katei ka por ki nongthep vote kin ioh ia ka lad ban ai ia ki jingtip bad ia ki kot ki sla kiba kongsan, ha ka por kaba donkam, hashwa ban shim ia kano kano ka rai ha kaba iadei bad ka jinglong jingman ka jongki kum ki nongthep vote.

Kum shi bynta jong katei ka jingpynshisha, 1,80,404 ngut ki nongthep vote (7.68%) kidei kiba lah dep ban ithuh kum ki Absent, Shifted, Deceased bad Duplicate (ASDD). Kiba la khlad noh ki don 81,490 ngut (3.47%), ki bym shim la pynphai ia ki EF ki don 45,013 ngut (1.92%), kiba la kynriah jaka pura ki don 42,532 (1.81%), kiba la kyntait ia ki EF ki don 4,668 ngut (0.20%) bad kiba lah dep ban Enrolled (Duplicate) ki don 6,701 ngut (0.29%).

U Chief Electoral Officer ka Meghalaya, ula ai khublei ia baroh ki seng sain pyrthei ia ka jingai ia ka jingiatreilang ha ka jingleh ia ka Special Intensive Revision. Ka jingai jingkyrshan kaba pura jongki Booth Level Agent (BLA) kiba la thung da ki seng sain pyrthei kaba la noh synniang shi katdei ia ka jinglong khuid long suba, ka jingiashimbynta jong ki paitbah bad ka jingseisoh ha kaban pyntreikam pura ia kane ka SIR.

U CEO ula ai khublei ruh ia ka tnad Election baroh kawei, kaba kynthup naduh ki District Election Officer (DEO), Electoral Registration Officer (ERO), Assistant Electoral Registration Officer (AERO), Booth Level Officer (BLO), BLO Supervisor, Election Technical Team, District SIR Team, Data Entry Operator bad baroh ki ophisar bad ki nongtrei kiba don bynta bad ka jingleh ia ka
Special Intensive Revision.

Ula ai khublei ruh ia ka jingai jingkyrshan jong ki Dorbar Shnong, Nokma, nongialam shnong, ki kynhun bad ki seng jong ka imlang sahlang, ki seng sain pyrthei, ki lad pathai khubor bad ia baroh ki nongshong shnong ka Meghalaya, ha kaba ka jingiashimbynta ka jongki bad ka jingai ka jingiatreilang kala pynlong ia ka jingleit rung ha ki iing ki sem jong ka Special Intensive Revision kaba jop.

Ka Tnad Election mynta kan pynleit jingmut ha kaban pynshisha ia ki nongthep vote kiba la pynhap ha ka kyrdan No Mapping bad ASDD bad ban pyndep ia baroh ki jingdonkam kaban lam sha ka jingpynmih ia ka Draft Electoral Roll ha ka 5 tarik u Naialr 2026 kumba la pynbna da ka Election Commission of India.