Shillong, Naitung 29: Ka bynta jong ka surok Shillong-Dawki kaba la julor, la khmih lynti ban pyntreikam noh hapoh jong ka shi taiew, la ong u Symbud Myntri Rangbah ka Jylla uba khmih ia ka PWD (Roads) u Bah Prestone Tynsong hynne ka sngi Balang.
U Bah Tynsong ula ong ba ka surok Sub-Way la tei hadien ba kala don ka jingshah rong noh jong ka surok bad ki kam ki jam mynta kila iaid ha ka wat kaba khatduh.
“Nga dap da ka jingkmen ban pyntip ba ka jingshna ia ka Sub-Way kadei kaba lah jan dep lut ha ka wat kaba khatduh. Ki kam ki jam kila iaid miet bad step bad nga ngeit skhem ba hapoh jong ka shi taiew, ngin sa lah ban pyndonkam biang ia ka surok Shillong-Dawki” ula ong ha ki nongthoh khubor.
Katkum ka jingong u Bah Tynsong, la dep ban bthah ia ka NHIDCL bad ia ki bor kiba dei khmih ban trei ia katei ka kam.
Ula bynrap ba ula iakren man la ka por bad ki bor pyniaid district, u DC, SDO Civil bad ki ophisar jong ka PWD ban khmih bniah ia ka jinglong jingman jong ki kam ki jam.
Symbud Myntri Rangbah ula pynshai ba ka Shillong-Dawki Road kadei ka projek kaba la pyntreikam da ka Sorkar India lyngba ka NHIDCL hapoh jong ka Ministry of Road Transport and Highways bad kam dei satia ka sorkar jylla kaba khmih beit beit ia katei ka projek.
“Na ka liang ka jong ngi, ka sorkar jylla bad ka tnad PWD, ngi dang iatreilang bad ka NHIDCL. Ia kino kino ki mat ne jingeh kiba ka don, ki bor district ki ju leit ban tuklar. Kata kadei ka kamram jong ka Sorkar Jylla” ula ong.
“Ngi lah dep ban pynapw hakhmat ka jongki bad ngi lah dep ong ia ki ba kidei ban pynthikna ba ka jingiaid jong ki kam ki jam kadei ban long kaba sngewhun” ong u Bah Tynsong.
 u Bah Prestone Tynsong hynne ka sngi Balang.){kind=link}