Shillong, Jylliew 22 : Ki paid ieit phutbol ka jylla ha ka sngi Balang ki la sakhi ia ka jingiakhun kaba itynnad bha hapdeng ar tylli ki kynhun ialehkai ba bna nam ka jylla ha ka Shillong Premier League, kata hapdeng ka Langsning bad ka Nangkiew Irat.
Ha ka jingiakhun, ka Nangkiew Irat ka la ioh ban pynphai haduh ar kol na ka shi kol ba ka shah lamkhmat ban pyniakhaid ia ka Langsning da mar 2-2 kol ha ka jingiakhun kaba long ha madan Third Ground Polo.
Ia ki kol ka Langsning hynne ka sngi la ioh ban thep da u Ronney Kharbudon ha ka minit kaba 41 jong ka kylla step bad na u Kynsaibor Lhuid ha ka minit kaba 71 jong ka kylla miet.
Ia ki kol jong ka Nangkiew Irat pat la ioh ban thep da u Lambor Nongsiej ha ka minit kaba 45+3 jong ka kylla step bad ia kawei ka shi kol pat la thep hi da u Batskhem Thangkhiew sha kol la jong ha ka minit kaba 88 jong ka kylla miet.
Kaba pynitynnad ia ka jingiakhun kadei ba ka Nangkiew Irat ka la ioh ban khie khlieh wat hadien ba ka la shah rem haduh 2-0 kol ha ka Mawlai ha ka jingiakhun ha ka kylla kaba nyngkong kaba long ha ka taiew ba la dep. Ha kane ka sngi, ka Nangkiew ka la sei lut ia u Nongsiej, Chanmitre Thma, Apborlang Kurbah bad u Rapborlang Marwein.
Haba phai pat sha ka Langsning kaba la ioh ban pynliem ia ka Shillong Lajong ha ka kylla kaba nyngkong da 1-0 kol ka la pynrung arngut ki durkhmat thymmai, kata ia u Kitboklang Pale bad u Batskhem Thangkhiew ha ka thup ki nongialehkai ba nyngkong.
Ka jingiakhun kaba bud pat kan long hapdeng ka Malki pyrshah ia ka Mawkhar ha ka sngi Thohdieng. Kumban shu kdew hangne, ka Malki ka la shah rem ha ka Ryntih katba ka Mawkhar pat ka iakhaid bad ka Rangdajied ha ka jingiakhun ha ka kylla kaba nyngkong.
