Shillong, K’lyngkot 20 : Ki Nongtrei kiba don ha ka synjuk Mawmluh Cherra Cements Employees Union (MCCEU) kila dawa ia ki bor pyniaid jong ka kompani ba kan pyllait noh ia ka jingiarap song pisa bad ka installment ba nyngkong jong ka Special Scheme bala tyrwa ban ai sha ki Nongtrei hashuwa ban kut une u bnai.
Ia kane ka rap la shim ha ka jingialang jong ka Union kaba long ha ka sngi Nyngkong.
Ha ka shithi bala phah sha u Managing Director ka MCCL, ka MCCEU kala ong “Ia jingiarap song pisa bad ia ka 1st Installment jong ka Special Scheme bala tyrwa sha ki nongtrei ka MCCL, dei ban siew noh haba kut u bnai Kyllalyngkot kumba la kular da ka Joint Committee ba long ha ka 16 tarik Nohprah 2024 ha Secretariat hapdeng ki bor pyniaid, u MLA ka Sohra bad Shella lem bad ki Nongtrei”.
“Lada kam don kano kano ka jingshimkhia ne ka sienjam ban pynbeit ia kane ka jingdawa jong ngi, ngin sa shim ia ki sienjam ba dei ban shim hadien ka jingiasyllok bad baroh ki nongtrei” kala maham.
