Shillong, Jylliew 07: Ka All Jaiñtia Muster Roll Workers & Labour Union kala dawa ïa ka Sorkar Jylla ba ka dei ban pyllait noh mardor ïa ka jingsiew bai bylla kaba dang sah lai bnai jong ki nongtrei muster roll hapoh ka tnat PWD bad PHE ha shwa ka lehniam Behdeiñkhlam.
Ha ka jingialang jong ka Central Executive Committee kaba la long ha Mihmyntdu, ka Union ka la kyrpad ia u Chief Engineer, PWD Roads and Building bad ka tnat PHE ban pyllait noh ia ka bai nong ba dang sahteng naduh u bnai Lber, Iaiong bad Jymmang 2026.
U Advisor ka Union u Bah Khroo L Pariat u la ong ba kane ka jingpynslem ban pyllait iaka bai nong ka ktah jur ia ki nongtrei Muster Roll bad ia kiba ha iing ha sem jong ki. “Ka jingpynslem ban pyllait ïa ka bainong jong ki nongtrei muster roll ha PWD bad PHE ka ktah ïa ka jingim jong ki namar ba ka jinglut jingsep bad ka dor jong ki mar mata ka dang iai kiew man ka sngi” u la pynpaw.
U Khroh u la buh jingkylli ruh ïa ka jingkitkhlieh bad ka jingtrei hok jong ki ophis jong ki tnat namae wat hapdeng ka jingbthah jong ka tnat Finance ïa baroh ki tnat Sorkar ban aiti ïa ki jingtip ba bniah jong ki nongtrei muster roll. Kane ka jingbthah ka long ban ailad ia ka Sorkar ban buh pisa lai bnai shwa na ka bynta ban siew ia ka bai nong.
U la kdew ba u Myntri Rangbah ka Jylla Conrad K Sangma kham mynshwa u la pynthikna ba ka pisa na ka bynta ki nongtrei muster roll ka don.
Ka Union ka kyrpad ia baroh ki heh jong ki tnat Sorkar kiba ai kam ia ki nongtrei muster roll ba kin pyllait noh ia ki jingsiew kiba dang sahteng khlem da pynslem shuh.
Ka la pan ruh ïa ka jingïarap jong u Myntri Rangbah ka Jylla, da kaba kdew ïa ka jingkordor jong ka Behdeiñkhlam ha Raij Jowai bad Raij Tuber.
“Ngi kyrpad ïa u Myntri Rangbah ka Jylla ba un bishar bniah ïa kane ka jingkyrpad, khamtam ba ka Behdeiñkhlam ka la jan, dei ban pynsiew lut iaka bai nong ba dang sah hashwa ban kut u bnai Jylliew khnang ba ki nongtrei kin ïoh ban rakhe ïa ka lehniam ryngkat bad kiba haïing hasem,” ong u Bah Khroo.
Ka Union ka la kyntu ia ka Sorkar ba kan pynkhuid noh iaka Arrear ba dang sahteng kiba dei ban siew sha ki nongtrei muster roll.
