Shillong, Jylliew 06 : Ka Sorkar Jylla kala pyrrkhing iaka Rules ba khmih ia ka jingpyndait ia ki ‘Name Plate’ ha ki kali Sorkar, kaba pyrrkhing ban pyndonkam thik tang ia ki Heh ki hain, ki Nongmihkhmat paidbah, ki Judge, bad ki Ophisar Sorkar haba maham pat ban pyndait khlem da ioh jingbit na ka Sorkar.
Ka Tnad Transport kala pynlait ia ka kyrteng jong ki briew kiba lah ban pyndait ia ki “Name Plate” ha ki kali kat kum ka Motor Vehicle Regulation, 2026, bad batai ruh ha kano ka rukom yn pyndonkam iakine ki “Name Plate”.
Kane ka jingpyrrkhing kala treikam naduh ka jingpynmih ia ka jingpynbna ha ka 1 tarik Jylliew.
La ong ba hapoh ka jingpynbna, ym dei ban don ki kali ba pyndait ‘Name Plate” ba don ia ki kyrteng jong ki Tnad Treikam lane ki kyrdan jong ki Heh Ophisar khlem da ioh jingbit na ka Sorkar lyngba ka Tnad Transport.
Kane ka jingpyrrkhing ka shah ia ki briew kiba bat ia ka bor kat kum ka Riti Synshar bad ki Nongshakri paidbah ba kynthup ia u Lat ka Jylla, u Myntri Rangbah, Symbud Myntri Rangbah, ki Myntri Sorkar, Speaker bad Deputy Speaker, Member of Parliament, dkhot ka Legislative Assembly (MLA), ki Chief Executive Member ki District Council (ADC), ki Judge ka High Court bad Subodinate Court, u Chief Secretary, Director General of Police, Deputy Commissioner, Superintendent of Police bad kiweikiHeh Ophisar bala rangbah.
Ia kane ka jingpynbna la pynmih da ka jingthmu ban khanglad ia ka jingpyndonkam bakla. Ka jingpynbna ka ong ruh ba ia ki ‘Name Plate” dei ban weng lane ban tap noh haba kine ki Heh ki Hain ne Ophisar kim don satia hapoh ka kali.
Kane ka Rule ka treikam ruh shaki Chairperson bad Dkhot jong ki bor treikam ba ithuh da ka Riti Synshar ka Ri bad ka ain, bad kumjuh ruh kum u Vice-Chancellor, Pro Vice-Chancellor bad Registrar ka Central bad State Government Universities.
Ki Heh Ophisar ki ong ba kine ki jingpyrrkhing ki thmu ban wanrah ia ka jinglong kaweiha ka rukom pyni ia ka kyrdan jong ki Heh ki Hain bad khanglad ia ka jingpyndonkam khlem ka jingbit ia ki kyrdan ba ai ka Sorkar.
Kaba kongsan, ka Sorkar kala pynshai ba kane ka jingpynbna kam shym la ai ia kano kano ka hok ban tah iit iong, pyndait beacon ne red light khlem ki jingthaba. Kum ia kane ka hok, lada don, kan iai bteng ban hap hapoh ka jingkhmih jong kiwei pat ki rule bad jingpynbna bala pynmih da ka Tnad kam Pohiing.
