Shillong, Jylliew 07 : Ka bor district ks South West Garo Hills, kala pynmih ia ka jingpynbna ba bthah ia ki trai jaka bad ki longiing ba kin aiti noh hapoh 60 sngi ia ka jaka bala thied da ka Sorkar naka bynta ka Tura Bypass project, ka ban plie lynti ia kawei pat ka wat ban pyntrei ia kane kasurok Highway.
Kane ka jingpynbna, bala pynmih da ka Ophis u Deputy Commissioner bad Competent Authority for Land Acquisition (CALA) ka treikam ia ki jaka bala thied da ka Sorkar na ka bynta ban shna ia ka surok 2- lane bypass, kaba pyniasoh ia ka shnong Gambegresha Indikgre.
Kat kum ka jingong ki bor district, ki jaka kiba la thied ki dei kiba la ai jingmynjur da ka SorkarPdeng hapoh ki kyndon jong ka National Highway Act, 1956, bad ia ka bai jai balabuhda ki trai jaka la dep ban mynjur bad la thep sha ka Competent Authority for Land Acquisition.
Ka Deputy Commissioner (Revenue) bad CALA, ka Anendya Raajsshre, IAS, kala hukum ia baroh ki trai jaka bad ki briew kiba pyndonkam ia kane ka jaka bala thied da ka Sorkar, ba kin aiti noh ia ka jaka sha ka Sorkar, kynthup kino kino ki jingtei bad jingdon jingem ba don ha kine ki jaka, hapoh ka por kaba la buh.
Kala maham ba ka jingbym kohnguh ka lahban khring ia ki jingpynshitom kat kum ka kyndon 3E(2) jong ka National Highway Act, kaba aibor ia ki borkhmih ba kin knieh ia ki jaka bala thied.
