Shillong, Jylliew 07 : Ka North East Indigenous People’s Forum (NEIPF) ha ka sngi Ba-ar, kala dawa ia ka Sorkar Pdeng bad ka Sorkar Manipur ban leh eiei noh mardor halor ka “jingrung kyrthep ki myndei ri” ha ka thain Shatei Lam Mihngi, kaba la pynkylla dur ia ka jingdon paid ki jaidbynriew trai muluk ha ka thain.
Ka NEIPF kala dawa ruh ia ka Sorkar Pdeng ba kan tohkit halor ka jingdonkti jong ki Mynder Ri ha ka jingiakynad pher jaidbynriew kaba jia mynta hapoh kane ka Jylla ka thain Shatei Lam Mihngi ka Ri.
Kane ka jingdawa kala mih na ka jingialang Special Executive ki 27 ngut ki Nongialam ka NEIPF kiba la iakynduh ban shong bishar kam halor ka jinglong jingman ha Manipur. Ia kane ka jingialang la pynlong ha Bhagawati Prasad Baruah Bhavan, ha Guwahati.
Kat kum ka jingong ka NEIPF, baroh ki Kuki kim dei satia ki poiwir na Ri Myanmar hynrei ha ki khyndiat snem bala leit, bun bah ki jaidbynriew Kuki-Chin kila wan na Myanmar bad leit shong shnong ha ki Reserve Forest ka Jylla Manipur, kaba la nang pynbun paid ia ki Kuki-Chin da 30 % hapoh ka Jylla.
“Ngi kyntu jur ia ka Sorkar Pdeng ban tohkit ioh kine ki nongwei ki donkti lang ha kane ka jingjia ba mynta ha Manipur. Dei ban leh eiei lada kine ki nongwei ki donkti” ong u Chairman ka NEIPF Anup Chetia hadien ka jingialang.
Ka jingialang kala kyntu ruh ia ki paid riewlum trau jylla ka thain Shatei Lam Mihngi ban long kiba peitngor bha bad ban thaw ia ki lad ki lynti ha kaban tehlakam ia ka jingwan buhai shnong jong ki nongwei namar kine kin pynduh lad ia ka jingroi ha ka ioh ka kot ki trai paid riewlum.
Ka Jingialang kala iakren ruh halor ka jingkhaii ia ki jingdih buaid sha ka thain bad ong ba ki jingioh kurup ia ki jingdih buaid bad jingpynjot ia ki khlaw ki btap ha ka thain ka dei kaba sngewkhia jur na ka bynta ki pateng ban wan jong ka Ri.
Ka jingialang ka sngew ruh ba ka jingkyndang ia ki briew ba shong beain ha ki reserve forest ka dei ruh kawei na ki daw ba ki jaidbynriew Kuki-Chin kila iakhun pyrshah ia ki jaidbynriew Meitei ha Manipur.
Ka jingialang kala buh ka jingkyntu ia baroh ki jaidbynriew ha Manipur ba kin iapynbeit ha kaban iashongsuk shongsain noh. Kala kyntu ia baroh ki jaidbynriew ba kin kiar na kino kino ki kam kiba lah ban nang aiding ia ka jingiakynad.
 ha ka sngi Ba-ar, kala dawa ia ka Sorkar Pdeng bad ka Sorkar Manipur ban leh eiei noh mardor halor ka “jingrung kyrthep ki myndei ri” ha ka thain Shatei Lam Mihngi, kaba la pynkylla dur ia ka jingdon paid ki jaidbynriew trai muluk ha ka thain.){kind=link}