Shillong, Iaiong 24 : Ka Jaintia National Council (JNC) kala dawa ban pynlait noh na ka jingtreikam jong ka Mines & Minerals (Development and Regulation) Act, haba pynpaw ba ki kyndon jong kane ka ain, kim iahap satia bad ka rukom long ki jaka bad ka rukom shong u dewiong ha ki par ha ri-lum Jaintia nalor ka jingpynsangeh ia ka jingtih par ha ka thain.
Ka JNC ba ialam da u President Sambormi Lyngdoh, kala pynlong ia ka jingialang hynne ka sngi Thohdieng ban iakren ia ki jingeh ba iakynduh da ka ri-lum Jaintia namar ka jingkhang tih dewiong.
Ka JNC kala leit mih ruh sha ka Commission of Inquiry u (rtd) Chief Justice RS Chauhan, kaba la khot ban tohkit halor ki jingjia bapher bapher ha ki par dewiong ka ri-lum Jaintia.
“Kumba long mynta, ka jingeh kaba hakhmat eh ia ngi ka dei ka jingbym lah ban pdiang ia ki kyndon jong ka MMDR Act naba kam iahap bad ka rukom long ki jaka bad ka rukom shong u dewiong hapoh ki par ha ri-lum Jaintia” ong u Bah Sambormi.
“Ka jingtih wat tang khyndiat eh ia u dewiong ka lah ban ktah jur ia ka mariang, bad pynkylla ia bun bah ka jaka sha ka duriaw ka jingjot” ula ong haba bynrap “Ngi tyrwa sha ka Commission of Inquiry ba kan pynlait noh ia ngi na ka MMDR Act, namar khlem kane ka jingpynlait, ngin ym lah ban bteng ia ka jingtih dewiong ha ri-lum Jaintia” ula bynrap.
Ka JNC kala ong ruh ba ka Commission ka dei ruh ban kylli pyrthei halor kiwei pat ki lad iohkam iohjam nalor ka kam tih dewiong ha ri-lum Jaintia.
“….ngi phah khubor sha ka Commission ba kawei na ki lad treikam hapoh ka ‘Save Jaintia Mission’ ka long ia ka Sorkar ban pyntreikam ia ka Private Planning policy” ula ong.
“Hynrei sngewsih, ka long kaba sngewsih jur ba 80% na kine ki karkhana ki dei kiba long trai da ki nongwei, katba tang 15% ki dei ki trai shnong. Lad aka Sorkar ka lah ban wanrah ia kane ka policy, kan pynmih ia ka lad aikam aijam ha ka district jong ngi”.
Nalor kane, une u President ka JNC ula ong ruh ba ka seng kala ai jingmut ia ki Skill Development Institute ba kin pynkhreh ia ki samla ba kin lah treikam ha ki karkhana kiba la don mynta.
“Ngi la iakren ruh halor ka jingdonkam ban pynroi ia ka rep ka riang, naba mynta, ka karkhana aikam kaba don mynta ka dei tang ki karkhana dewbilat bad coke, kiba synniang sha ka jingpynjaboh bad pynjot ia ka mariang “ ula ong.
Ka Council kala ai jingmut ruh ban seng ia ki agro-processing unit haba kdew ia ki soh ki pai ba pynmih na ka thain.
“Ngi donkam ia ki karkhana kum ki karkhana na ka bynta u soh niamtra, uba mih pahuh bha hapoh ka District, ban lah pynmih umsoh. Kane ka long kaba donkam ban lah pyndonkam ia ki mar ba ngi pynmih, bad ngi la pyntip ia kane ban pynsuk ia ka jingpyrshang ka Commission ha kaban pynsngew ia ka sha ka Sorkar” ula ong.
 kala dawa ban pynlait noh na ka jingtreikam jong ka Mines & Minerals (Development and Regulation) Act, haba pynpaw ba ki kyndon jong kane ka ain, kim iahap satia bad ka rukom long ki jaka bad ka rukom shong u dewiong ha ki par ha ri-lum Jaintia nalor ka jingpynsangeh ia ka jingtih par ha ka thain.){kind=link}