Shillong, Iaiong 15: Ka jingtei ia ka Rain Museum ha Mawsynram ka dei kaba la iaid shakhmat bad la khmih lynti ban pyndep noh ia ka hapoh ka shi snem, ong u MLA ka UDP Bah Olan Sing Suin ha ka sngi Balang.
Haba kren halor ki sienjam ban kyntiew ia ka kam jngohkai ha ka constituency, u Bah Suin ula ong, “Ki sienjam ban kyntiew ia ki kam jngohkai, ki kynthup ia ka Rain Museum kadei kaba don hapdeng jong ka jingtei mynta bad ngin sa iohi ba la pyndep ia kane ka jingtei hadien jong ka shi snem”.
Haba batai shaphang ka jingpynwandur ia kane ka jingtei, ula ong ba ki nongwankai kin iohmad ia ka jinghap slap hapoh jong katei ka jingtei.
“Phin sa iohi ynda phi lah don hapoh jong katei ka museum, phin sa sngew kumba phi don ha ka rain museum namar ba ia ka sad la pynwan ha kata ka dur ba u slap un lang ha katei ka sad bad hap pat najrong jong katei ka sad sapoh madan” la ong u Bah Suin.
Ia kane ka project la pyntrei ha ka jinglut jingsep kaba kot T.27 Klur.
U Bah Suin ula bynrap ba yn shna ruh ia ka Pool ha ki bynta jong katei ka museum.
Ha kaba iadei bad ka jaka kaba la pynkhreh na ka bynta kane ka projek, u MLA ula ong, ba ka jingpynmadan bad jingpynryntih ka long kaba kongsan bha bad ula pynshai ba ka jingjied ia kane ka jaka kam shim la ktah eiei ia ki jaka rep.
“Yn tei ha ka jaka kaba suda ym ha ka jaka kaba ka khyndew ka long kaba sboh bha” la bynrap u Bah Suin.
