Shillong, Iaiong 15 : U Myntri Rangbah ka Jylla Conrad K Sangma ha ka sngi Balang, ula ioh iakren markhmat bad ki nongshongshnong ka Ksehkohlong ha ka jingialang CM Connect, kiba la pynsngew ia ki mat bapher bapher kiba iadei naduh ki jingtei ba donkam ha ki jaka nongkyndong sha ka kam kamai jakpoh bad ka pule dangle.
Ha kane ka jingialag, ki nongshongshnong kila pynpaw ia ïa ki jingeh kiba ïadei bad ka projek jngohkai pyrthei ba la khmih da ka Shnong, ka jingdonkam ban pynbha ïa ki surok pynïasoh, bad ki jingeh ha ka liang ka tulop bala mad da ki nonghikai jong ki skul shimet. Katto katne ngut ki nongshong shnong ki la aiti ruh ia ki dorkhas kiba batai ia ki jingdawa ba kyrpang jong ka thain.
Haba jubab ia kine ki jingeh u paidbah, u Conrad ula kular ba ka Sorkar kan nang bteng ban aiti ialade ha ka ban weng ia kine ki jingeh lyngba ka jingiatreilang ka ban bteng khlem kut. Ula ban jur ia ka jingpynleit jingmut jong ki bor Sorkar ban pynthikna ha kaban pynioh ia ka roi ka par ba mar katjuh bad ba ailing ia baroh ha kylleng ka Jylla Meghalaya, khamta ha ki jaka nongkyndong bad ki jaka ba duna ki jingai jingshakri.
“Ka Sorkar kala kut jingmut ban iatreilang ryngkat ryngkat bad ki shnong ki thaw ha kaban pynbeit ia ki jingeh bad ban kyrshan ia ki kam pynroi ki ban long ki jingmyntoi ia ka jingim ki nongshongshnong” ula ong.
Hadien kane ka jingiakren, u Myntri Rangbah ula leit jngoh ia ka jaka jngohkai ha Nohthlong bad pynpaw ba ka Sorkar kan kyrshan ha kaban pynkhlain ia ki jingdon jingem ha ki jaka jngohkai ba pyniaid da ki Shnong ki thaw, kiba long kum ki nongpyniaid shakhmat ia ka ioh ka kot bad ka iohkam iohjam ha ki jaka nongkyndong.
Ha kane ka prokram la iadonlang u MLA ka Nongstoin Bah Gabriel Wahlang, ka Deputy Commissioner Hema Nayak bad ki Ophisar na ki tnad bapher bapher.
