Nongpoh, Naitung 26: Ka Synjuk ki Rangbah shnong ka Nongkhrah Nonglyngdoh, kala byrngem ban shim noh biang ia ka jaka bala ai sngewbha sha ka tnad Education ka Sorkar Jylla ban tei ia ka Polytechnic ha Nongkhrah namar ka jingieh khongreng ia ka jaka khlem da lah pyndonkam.
Kane ka rai jong ka Synjuk ki Rangbah Shnong ka la mih hadien ba ka tnad Education kam shym la ai jubab ia ka jingpan jingshai ia ka jingbuhteng ban tei pyndep ia kane ka jaka pule kaba la shu iehnoh khongreng mynta la palat 5 snem kata naduh u snem 2018.
Lah ban kdew, ka Dorbar Shnong Nongkhrah kala ai sngewbha ia ka jaka sha ka Sorkar naduh u snem 2018 ban tei ia ka Polytechnic ha ka jingmang tyngka ba kot T. 7 klur eiei. Lah buh por ban pyndep ia kane ka jingtei hapoh ka 24 bnai.
Ka Tnad Education kala dep ban pyllait ia ka pisa kumba 2 klur ha ka wat ba nyngkong hynrei kane ka project kala shu sahkut khongreng noh khlem da pyndep tad haduh kine ki sngi kaba la kynjoh sha ka 5 snem eiei.
Ka Synjuk kj Rangbah Shnong ka thain kila hiar jurip biang ia kane ka jingtei hynnin ka sngi nyngkong hapoh ka jingialam u Bah L.S Pamshong, Chairman, u Bah Cyril Maring Secretary, u Lyngdoh ka Raid Nonglyngdoh Bah Sensi Lyngdoh, u Bah Celestine Syngkli, Rangbah shnong ka Nongkhrah lem bad ki rangbah shnong na kiwei kiwei ki shnong kiba hap hapoh ka Raid Nongkhrah bad Raid Nonglyngdoh.
“Ngi sngewkhia jur halor ka jingkuman jong ki bor sorkar ban ai jubab ia ka jing pan jingshai halor kane ka project” ong u Chairman.
“Kane ka jingleh ki bor sorkar ka pynbor ia ngi ban shim rai ba lada kam don shuh kano kano ka dak ka shin ban sdang ne pyntrei pyndep ia ka project ba dang sah, ngim banse ban shim biang noh ia kane ka jaka bala ai sngewbha” ula bynrap.
Ki Nongialam ka Synjuk ki pyntip ba kila pyrshang ruh ban wad jingtip na u Contractor ba pyntrei ia ka project, halor ka jingiehnoh shiteng ia ka kam hynrei ka jubab ba u ai ka long ba ka sorkar kam shym la pyllait ia ka pisa ban trei pyndep ia ka kam.
Hadien ka jingjurip, ki nongialam ka SKRS Nongkhrah Nonglyngdoh ki la leit ban ia kynduh ia u Deputy Commissioner ka Ri Bhoi District ban ai ka jingpyntip sha u halor kane ka jingsahteng ka project bad ruh la dawa ba un shimkhia ban rah ia ka khubor sha ki bor ba halor ban pyndep noh kloi ia ka project lem kumta ki bor ka SKRS kim banse ban shimti biang ia kane ka jaka kaba la ai sngewbha sha ka sorkar jylla.
