Kyntait u DyCM ba kynnoh ai hukum u CM ban siat iap ia u MDC ka BJP na Tura

Date:

Share post:

Shillong, Naitung 26 : U Symbud Myntri Rangbah ka Jylla Bah Prestone Tynsong hynnin ka sngi nyngkong, ula kyntait war ia ka jingkynnoh ba u Myntri Rangbah ka Jylla Conrad Kongkal Sangma, u la ai ka hukum ban siat iap ia u Nongialam ka BJP bad MDC ka Tura Bernard N Marak, uba la phetrieh hadien ka jingkyndang ki Pulit ia ka kam khaii met hapoh ka farm shimet jong u ha Edenbari, West Garo Hills.

“Ki jingkynnoh hi ki sah tang ki jingkynnoh hynrei nga iathuh ha phi ba ngam ngeit satia ia kata. Ki paidbah ruh kin ym ngeit satia ba ka dei tang ka thma politics. Ha kano kano ka Constituency, ngi don beit kiba ialeh pyrthei hynrei kam mut ba tang namar nga don ha ka bor, ngan shu leh ia kane-katai kiba beain” ong u Bah Prestone.

U Bernard Marak ha ka kyrwoh bala phah lyngba ka video myn ha ka sngi U Blei, ula kam ba u khlem phetrieh satia na ka kti jong ka ain hynrei dei ba u sheptieng ia la ka jong ka jingim namar u Myntri Rangbah ula ai ka hukum ban shu siat iap beit ia u bad ruh ba ka jingkhynra jong ki Pulit ka dei kaba la suhbuit namar ka BJP kala nang khlain bor bad buh jingma ia ka NPP ha Ri-lum Garo.

Haba pynpaw ba kane ka dei tang ka drama politics, u Bah Prestone ula buh jingkylli kylla ia ka jingbym lah jong u Bernard ban ujor ejahar pyrshah ia u Myntri Rangbah ka Jylla pynban ula jied ban phetrieh.

“U Nongshah kynnoh (Bernard) ula pynmih ia ka jingkynnoh kaba heh bha ba u Myntri Rangbah u kwah ban siat iap ia u. Kane ka dei ka kam kaba hap ban shimkhia bha. Phim lah ban shu leit sha ki lad pathai khubor, nyngkong phi dei ban ujor ejahar bad hadien phi lah ban iakynduh ia ki lad pathai khubor lada ki jingkynnoh jong phi ki dei kiba shisha” ula ong.

“Kane hi ka dei tang ka drama politics. Ka dei ka drama politics jong u ban ioh ia ka jingkyrshan ki paidbah ia kaba nga sngew baka dei kaba bakla eh. Balei ba phi hap ban sheptieng? Balei ba phi jah rngai? Lada ki pulit ki kwah ban iasyllok lane tohkit, balei ba phim leit sha ki. Balei ba phi hap ban leh drama politics” buh jingkylli u Symbud Myntri Rangbah.

Haba kylli, u Bah Tynsong ula ong “Ka jingkynnoh ka long kaba khia bha. Lada ka dei kaba shisha, ai ba un wan bad ujor da ka ejahar khnang ba ka ain kan shim iala ka jong ka lynti”.

U Bah Prestone ula ong ba une u MDC um dei satia ban leh kumne kumba u leh tang namar ka jingkhynra bad u dei ruh ban ap ia ka jingtohkit haduh ban da dep.

U Bah Prestone ula ong ruh baka jingkhynra jong ki Pulit ka dei kaba la pynlong halor ka jingioh jingtip kaba bniah bad bynrap “Khlem ki jingtip ba bniah, kin ym leit matlah tang namar ba u CM ula bthah ia ki ban leh lane tang namar ba u DyCM ne u Myntri kam pohiing ula bthah ia ki ban leh”.

U ong ba ki Pulit kila leh iala ka jong ka kamram bad ka jingtohkit kaba bniah kala iaid halor kane ka kam. Ula pyntip ruh ba haduh 22 ngut ki briew kila shah pynngat mynta ha ka Judicial Custody katba 10 ngut ki dang don hapoh ka Police Custody.

“Ai ba ka jingtohkit kan dep bag hadien kane ngin sa lah ban ioh ia ka jingtip kaba shai, ngin sa lah ban tip thikna ba mano ba don ha kane ka farmhouse” ong u Bah Prestone.

Halor ka jingkynnoh ka Congress baka jingkhynra ka dei tang ka buit ban tapeit miaw ia ki kam jakhlia jong ka sorkar MDA, u Bah Prestone ula ong “Ngam ju poi ban jubab ia kum kine ki jingkynnoh. La ka dei ka Congress ne mano mano ruh, ngam dor por ban jubab ia kine ki jingkynnoh khlem nongrim”.

U Symbud Myntri Rangbah ula ong ba ka dei ka kamram jong ka Sorkar ban ai jingiada ia ka jingim jong baroh ki Nongshongshnong ka Jylla haba kynthoh ia ka jingkyrpad jong ka BJP ban ai jingiada ia ka jingim u Bernard N Marak.

U President ka BJP-Meghalaya Bah Ernest Mawrie ula dawa ruh ia ka Sorkar Jylla ban weng noh ia ki jingkynnoh ba khlem nongrim pyrshah ia u Bernard uba dei u Vice President ka BJP ha Jylla.

Share post:

spot_img

Popular

More like this
Related

IED explosion rocks Jiribam, no casualties reported

Imphal, Mar 29: Ahead of Lok Sabha elections, a...

Villager killed in elephant attack near Garobadha

Tura, March 29: A villager has lost his life...

Thalain ka SPC ia u President ka VPP ba kynthoh ia ka burom ka ijot ki Nongthoh khubor ka Jylla

Shillong, Lber 28 : Ka Shillong Press Club (SPC)...

Pynjari 144 CrPC u SDM ha Sohra Sub Division namar ka jingshah pyniap ki bar jylla ha Ichamati

Shillong, Lber 28: U Sub Divisional Magistrate ka Sohra...