Shillong, Nailar 28: Ki Nongtrei Mid-Day Meal ne ki Nongshet bam ha skul, kiba don hapoh ka lama All Ajintia Mid Day Meal Workers Union, Jowai, kila byrngem ban wan pynlong noh da ka jingiakhih ha Nongbah Shillong namar ka jingbym lah jong ka Sorkar ban pynurlong ia ki mat jingdawa jong ki, kiba la sahteng la slem.
Kine ki Nongshet bam kila pynbna ban wan iakhih ha ka 29 tarik Nailar.
U Nongialam ka Union Bah Jerry Suting u pyntip ba kane kan dei ka jingiakhih kaba khatduh jong ka Union haba kyntu ia baroh ki Nongshet bam Mid Day Meal bad ki Nongtrei na kylleng ka jaka ba kin wan iashimbynta lang ha kane ka jingiakhih ban long lashai ka sngi nyngkong.
Ka jingdawa ba hakhmat eh jong kine ki Nongshet Mid Day Meal ka long ba ka Sorkar kan kyntiew noh ia ka bainong jong ki kaba mynta ki ioh T.1000 shibnai.
Lah ban kdew hangne ba ka Sorkar Jylla kala siew 90% sha ki Nongshet bam Mid Day Meal katba ka Sorkar Jylla ka siew 10%.
Ki Nongshet bam Mid Day Meal kila dawa ia u Myntri Rangbah ka Jylla ban kyntiew noh ia ka bainong jong ki khnang ba kin lah ban kyrshan ia ka iing ka sem.
