Jowai, Nailar 28: Ka Jaiñtia Students Movement-Central Body hynnin ka sngi saitjain kala pynkup burom ia ki samla pule da ka 4th Academic Exellence Award ban pynshlur bad ai mynsiem ia ki samla pule ba kin minot thop ha ki jingpule jong ki.
Ia kane ka jingialang ai khusnam la pynlong ka Yungwalieh (Community Hall) ka Tpep Pale, Jowai bad la pynshongkun ia ka da ka jingiadon ryngkat u Myntri ka Tnad Pule Puthi ma Lahkmen Rymbui kum u Kongsan ha ka jingiadonlang u BahL.S. Lyngdoh, Joint Director of School Education & Literacy, West Jaiñtia Hills bad ki Dkhot ka JSM.
Ia kane ka Excellence Award la ai sha ki samla kiba ioh haduh 80% ka marks ha ka eksamin SSLC, HSSCL bad Graduation.
U President ka JSM Bah Lenning Star Rymbai haba ai jingkren ula pynkynmaw ha ka jingialang halor ka jingdonkam ban don noh ka College Sorkar ha East Jaintia Hills namar ka Kiang Nongbah College, Jowai kala bun paid palat.
U Myntri ula ai ka jingkyntu ia ki samla pule ba kin nang trei shitom namar ki dang don bun ki eksam kaba kin hap ialeh ha ka jingim jong ki haba kitbok ruh ia ki ba kin nang ioh kheit ia u soh ka jingjop.
Halor ka jingdawa ka JSM ban buh ia ka College Sorkar ha East Jaintia Hills, u ma Lahkmen ula ong ba ka Ri-lum Jaintia ka dei kaba donbok tam namar kala don haduh lai tylli ki College ha ka thain bad mynta n aka People’s College Scheme, kala ioh haduh T.10 klur shisnem.
Ula kyntu ruh ba ki samla pule kim dei eh ban peit tang sha ka Kiang Nongbah College kum ka jaka pule hynrei ban leit ruh sha kiwei ki College kiba don ha Ri-lum Jaintia haba pyntip ba mynta kila don haduh 8 tylli ki College ha ka thain.
Kiwei pat kiba la kren ha ka jingialang ki kynthup ia u Bah O.Tariang President JYF, Central Body, Jersom Shylla President JSU Central Body, Wanbun Dkhar General Secretary HITO, Central Body, Roaming Star Lamare General Secretary HYC, Jaiñtia Hills, bad Streamly Shuchen President KSU EJHD Unit.
Haka yalang wa pynlai u Jimmy Kharmuti Working President JSM, Central Body, da yoh i klam pdiang na u Nathan Ribok Biam President JSM Western Region, i klam yahkhmat na u Heyboyme Myrphet Education Secretary JSM Central Body.
