Shillong, Naitung 1 : Ka Head of Department jong ka sobjek Khasi ha Shillong College, Dr. Ailynti Nongbri ka la ong ba kito kiba kwah ban kren Khasi ki dei ban kren beit da Khasi khlem da khleh jaktung bad lada ki kwah ban kren da ka English ruh ki dei ban kren beit tang kawei.
Ia kane ka la kren ha ka ‘State Level Symposium ba la pynlong da ka Khasi bad History Department jong ka Sohra Government College kaba long ha ka 30tarik u Jylliew, 2022 ha katei ka College hi halor ka phangpdeng – Ka jingbuh dor ia ki jingrwai Khasi ba la thoh da ki nongrwai bapher bapher.
“Wat ju bud tynneng, haba kren Khasi kren beit tang Khasi bad lada kren English kren beit tang English wat ju kren khleh,” ong katei ka Nonghikai.
Nalor kata, ka ong ruh ba dei ban pynmlien ba wat haba rwai ruh dei ban kiar na kaba kynnoh ne pyndonkam da ki dak phareng ha ki jingrwai Khasi. Ka da ai nuksa ruh ba ha ka Ktien Khasi ym ju don u ‘f’ lane u ‘v’ kumta ki paidbah katba lah dei ban kiar na kaba kynnoh stai.
Haba kren pat halor ki jinghikai ha ka put ka tem Khasi, ka la iathuh ba ki sngew burom haduh katta katta ïa i Padma Shri, Dr.Helen Giri kaba la maitphang bad long ka Matti ba skhem bad ka jabieng jong ka kaba long kum u khulom ksiar.
Ia katei ka symposium la wan ban plie da u CEM ka KHADC Bah Titostarwell Chyne bad pynhap pyrda pat da u Bah Gavin Mylliem, MLA ka Sohra.
