Buh dak jingkylli ka KSU ia ka Sorkar MDA halor ka dorkhas u snem 2018

Date:

Share post:

Bynniaw ba khlem pat urlong kawei ruh ka jingdawa

Shillong, Naitung 01: Ka Khasi Students Union (KSU) Sengkmie, kala buh dak jingkylli ia ka Sorkar Meghalaya Democratic Alliance (MDA) ba ialam da ka National People’s Party (NPP) halor ka dorkhas ba ka seng kala aiti ha u snem 2018 haba ong “mynta la jan dap 5 snem, ngim pat iohi ia kino kino ki dak ki shin ban pynurlong ia kine ki mat lait tang ki jingkthang mynsiem bad ki jingjaw ummat ba laiphew jait jong ka Jaidbynriew”.

Ka KSU kala buh ia une u dak jingkylli haba pynkynmaw ia ka dorkhas bala aiti ha ka 5 tarik Iaiong 2018 ha ka kti u Myntri Rangbah ka Jylla Conrad Kongkal Sangma kaba kdew ia ki katto katne ki mat kiba donkam ban iada ban kyntiew ia ka Jaidbynriew ba kynthup ia ka jingpyntreikam mardor ia ka Inner Line Permit (ILP), ka jingpynrung ia ka Ktien Khasi ha ka khyrnit kaba phra, ka jingkhuid jingsuba ha ka jingpynlong ia ki eksamin thungkam lyngba ka Meghalaya Public Service Commission (MPSC), ka jingiapynbeit ia u pud u sam, ka Indo-Nepal Friendship Treaty 1950, ka Education Policy bad kiwei kiwei.

Kat kum ka kyrwoh bala phah da u General Secretary ka KSU samla Donald V Thabah, ula ong ba ka jingdawa ia ka ILP kala shu kut tang ha ka jingkular bad ha ka jaka ban pyntreikam ia ka, la wanrah pynban da ka ain kaba long markhongpong kata ka Citizenship Amendment Act (CAA) kaba plie lad ban pynlong nongshongshnong ba pura ia ki poi ei na Bangladesh bad nawei nawei.

Haba pynpaw ba ka jingiakhih pyrshah ia ka CAA kala poi shaduh u pud ba da ki phew ngut ki dkhot ka KSU kila shah pyndik ha ka Tnad Pulit kaba khot hajir na ka por sha ka por, une u Nongialam ka KSU ula ong “Wat hapdeng kine ki jing iakhih, ngi la iohi pynban ia ki jingshah thombor ki Khasi ha Them Metor, Rilbing, ha Golflink (jingshah pyniap u Khershanroy Marwein),ha Ichamati (jingshah bomiap u Lurshai Hynniewta), ha Ghoraline, ha Laitumkhrah, ha Them Bijoy, ha khappud Assam ha Jatalong, ha Madan Umwang (shah pyniap u Tyngshain Mukhim ha ki Nepali) bad kiwei kiwei”.

“Da bishar ia kine ki jingshah thombor ki Khasi hala ka Ri la long jemdaw namar ym ju jia koit hangno hagno ruh ba ki trai shnong kin shah iuhroit hala ka jong ka rympei” ula ong haba bynrap “Kine baroh ki pyni ba ka Sorkar kam shym la leh eiei ban pynshitom thikna ia ki runar mynder ba thombor ia ki Khasi pynban ia ki Khasi pat ka thwet kum kito ki runar kiba la dep pyntriem hajan baroh kawei ka sla pyrthei”.

Une u Nongialam ka KSU ula buh jingkylli ruh ia ka Tnad Pulit “Shaei ki khubor halor kitei ki jingshah thombor ki Khasi? Katno ngut la kem? Shaei ki kyrwoh jong ka Tnad kam Pohiing ynda la shah shoh ne shah pyniap ki Khasi?”.

Halor ka Them Metor, une u Nongialam ka KSU ula kynthoh jur ia ka Sorkar MDA ba kam shym la lah ban pynkhih ia ki briew ba sah beain bad ong “Lada ki dei kiba trei ba ktah ha ki Tnad Sorkar balei ym phah noh ia ki sha ki Quarter Sorkar?

U Samla Donald u pyntip ba ka Sorkar Jylla ka don jingthmu ban pynkynriah ia baroh ki paid Harijan na Them Metor sha Them Mawbah haba ong ruh “Ka Sorkar ka ong ban pynsah ia kine ki harijan ha Jhalupara hynrei ka jaka ba ki thmu ban ai ka dei ha Them Mawbah. Kane ka long kumba thok ba shukor ia u paidbah”.

Haba kynthoh ia ka jingiakren pynbeit pud ki arngut ki Myntri Rangbah ka Jylla Assam bad Meghalaya, une u Nongialam ka KSU ula ong “U pud u sam haduh mynta u dang lyngkrang. Watla ka jingiapynbeit pud kala iaid shakhmat hynrei ki Pulit Assam pat ki dang iai wan tuklar man ka por”.

U la buh jingkylli “Shaei ka Tnad Pulit ka Jylla Meghalaya ban ai jingiada? Lada peit I kumba ki Pulit Assam kim khein snep ia ka Sorkar ne ki Pulit ka Meghalaya”.

Haba phai sha ka jingdawa pynrung ia ka ktien Khasi ha ka khyrnit ba phra, une u Nongialamka KSU ula ong “Kane ka jingdawa ka dang sah ha lyer”

U samla Donald ula ong ba ka jingbym lah jong ka Sorkar ban pynbiang ia ki jingangnud u paidbah kala pynbitar shna ia ki paid Khasi khamtam ia ki khun Samla. “Ka Sorkar kan hap pyrkhat bunsiem haba ka iakren ia kata ka Jingsuk bad ka roi ka kiew” ula ong.

“Ka suk ka sain bad ka roi ka kiew ka wan lyngba ka jingsngewshngain bad sngewhun ki trai Ri trai Muluk ka jylla. Ka seng ruh kam lah ban shu sngap bad long tang kum ki nongpeit kai ne ki nongbynniaw ha lynti ha syngkien” ula ong.

“Ka Ri Khasi kan ym long kum ka Tripura da lei lei ruh em ha kaba ki trai jylla kin hap pule bad kren da ka ktien ki nongbuhai shnong, ban hap rieh sha khlaw sha btaw, ban hap shong rit mynsiem ha la ki iing, ban shah knieh ka synshar ka khadar bad kumta ter ter. Ka KSU kan thom ia ka sang ka ma ban pynskhem hi triang ia ka jinglong shngain ha la ka Ri” ula bynrap.

Une u Nongialam ka KSU ula pyntip ba ka seng kala wan iakynduh ruh ia ki Nonghikai Adhoc kiba sahmiet habar ka Secretariat, kiba iakhih ban pynkiew bad pyllait ia ka tulop jong ki.

“Ka jingiasyllok hapdeng ki nongialam ka KSU bad ka FASTOM ka la pynkthang ia ka seng ha kaba la shem ba shibun na ki jingkular jong ka sorkar ia kine ki nonghikai ka shu long tang ha suin, tang ha ki jingkular khlem da urlong wat tang khyndiat ruh. Kine kiei kei baroh ki pyni ba imat ka sorkar kam khein snep ym tang ia ki jingdawa ki nonghikai hynrei wat ia ka hok ka jong ki ruh kumjuh” ula ong.

Share post:

spot_img

Popular

More like this
Related

Ngam jyllop 2 ngut ki Khynnah Kynthei ha Wah Rilang

Shillong, Iaiong 22 : Arngut ki Khynnah Kynthei kiba...

Expelled and Unbowed: Avner Pariat’s defiant exit unveils party’s political turmoil

Shillong, Apr 21: Former Voice of People Party leader...

Jingshah pyniap dusmon ha Rongmil | Dawa ki kynhun na Assam bad Garo ia ka jingtohkit hok ki Pulit

Goalpara, Iaiong 21 : Ki kynhun sengbhalang na Assam...

Elekshon Lok Sabha : Sdang u Amit Shah ban ialap elekshon da ka road show ha Silchar

Guwahati, Iaiong 21 : U Myntri kam pohiing ka...