Shillong, Naitung 1 : Ka Mawlai ka la ioh ban khanglad ia ka Shillong FC ban thep kol haduh ba kan da ioh ban khur ia ka jingjop kaba 1-0 kol ha ka jingiakhun jong ka Shillong Premier League kaba long ha ka janmiet Sngi Thohdieng ha madan Third Ground Polo.
Ka jingiakhun ha katei ka sngi kadei kaba bteng na ka jingiakhun kaba la pynkut noh shiteng tang ha ka minit kaba 62 jong ka kylla miet ha ka 21tarik Jylliew na ka daw ka jingther jong u lapbah. Ha katei ka sngi, ka Mawlai ka la ioh ban lamkhmat lypa shi kol lyngba ka kol ba la ioh ban thep da u Donborlang Nongkynrih tang ha ka minit kaba 30 jong ka kylla step.
Haba phai pat sha ka jingiakhun ha kane ka sngi Thohdieng, ym shym la don satia kiba ioh ban thep kol namar baroh arliang ki pynskhem triang ia ki phyllaw kol ha baroh ki shiteng kynta ba ki ialehkai.
Naduh ba sdang,ka Mawlai ka ioh tang shisien ban pynsyier lyngba ka bol kaba la khyrwit da u Donlad Diengdoh ha ka minit kaba 66 kaba la shu lait salit ia ka kol.
Watla na ka liang ka Shillong Lajong ka iakhun tyngeh hynrei kam shym la iohlad satia ban thep kol bad kane ka la iai bteng tad haduh ban da kut ka por ialehkai.
Kumba long mynta, ka Mawlai ka la ioh ban jop lut baroh lai tylli ki jingiakhun sdang bad kumta ka ioh pura 9 point bad don ha ka kyrdan kaba nyngkong. Ha kajuh ka por dei tang kane ka kynhun kaba khlem pat shah thep kol kawei ruh.
Ka Shillong Lajong pat mynta ka don ha ka kyrdan ba 7 da tang shi point na ki lai tylli ki jingiakhun.
Ka jingiakhun la shai ka sngi pat kan long hapdeng ka Malki Sports Club pyrshah ia ka Rangdajied United FC kaba dei ruh ka jingiakhun kaba khatduh jongka kylla kaba lai.
