Nongpoh, Nailar 02: Ki nongkitkam ka Hynniewtrep Youth Council (HYC), Raid Nongtung Circle ka la byrthen syndon ban pynlong da ka prokram iakhih da kaba mih paidbah ban pynsawa ia ka sur jingdawa ban maramot ne tei thymmai noh ia ka surok sha Mawhati ha Ri Bhoi District.
Ia kane ka jingpynbna ban iakhih da kaba mih paidbah ban dawa ia ka jingmaramot ia katei ka surok Mawhati, na ka liang ka HYC, Raid Nongtung Circle ka la pynbna ban pynlong ha ka 6 tarik u Nailar ha kaba yn iaid paidbah ha ryngkat ki jingthoh ban dawa ia ka jingmaramot ia ka surok kaban sdang ha ka 11 baje mynstep naduh na ka shnong Umpohwin Nongrim ter ter shaduh ka iew Mawlasnai.
Haba pyntip sha ki Nongthoh Khubor, u samla Mitaling Mynsong, Publicity Secretary ka HYC, Raid Nongtung Circle, u la iathuh, ba ka seng kam banse ban shim ia kane ka rai ban mih paidbah ban da ia la ka hok halor katei ka surok naduh Umsning sha Mawhati ka long hadien ka jingsakhi ia ki jingeh jong ki paidbah ha ka leit ka wan ka kit ka bah khamtam ki longkmie ba armet bad ki khynnah skul.
Na ka liang ka seng, ka la pynpaw ruh ia ka jingsngewkhia kaba jur, ba ki bor ka sorkar jylla khamtam ka tnat PWD ha ryngkat ki nongmihkhmat ki la shu hun ban ai tang ki jingkular ban shimkhia ban maramot ia ki jingsniew jong ki shilynter jong ka surok Mawhati hynrei ki paidbah kim ju sakhi satia ia kano kano ka jingshimkhia ban ioh ia ka jingmaramot ia kane ka surok mynta da ki snem ki snem.
Kumta, halor kane ka jingeh, na ka liang ka HYC kam banse ban shim ia kane ka rai ban pynlong noh da ki lad jingiakhih ban dawa ia ki bor ka sorkar jylla bad ka tnat PWD ban shimkhia noh mardor ban maramot ia ka surok jong ka thain Mawhati, ha kaba la khot la wer ia ki paidbah nongshong shnong ka Mawhati ban ia mih ryntih ha katei ka sngi khnang ba ka sur kan sawa jam ban sakhi ia ka jingkylla ha ka jinglong jingman jong ka surok jong ka thain Mawhati.
