Tura, Nailar 3: Ki Pulit ka Jylla kila khuslai ba u droks ula sdang jyllei bad rung sha ki kyntoit bapher bapher ka sor Tura da ka jiong ioh kurup biang ia u droks haduh laisien tang ha kine ki lai sngi ba lah leit noh.
U Superintendent of Police ka West Garo Hills u VS Rathore ula iathuh ba da ka jingioh khubor ba thikna, ka kynhun Anti Narcotics Task Force (ANTF) kila pynlong ia ka jingkhynra hynnin ka sngi ban ioh kurup haduh 576 tylli u dawai Tramadol Hydrochloride ba ju pyndonkam ban dih pynbuaid.
Ia une u dawai droks la ioh kurup na uwei u briew ba kyrteng u Chanchu Marak ba u dei na Balading, kaba hap hapoh ka Tura Police Station.
Nalor kane, kila kurup ruh ia kawei ka mobile phone bad ka sim card. Ka jingtohkit ia une u briew kala iaid shakhmat ban lapdien ia ka thymmei jong une u droks.
Ki Pulit kila register case ia u hapoh ka kyndon jong ka NDPS Act.
