Shillong, Jylliew 12: U Myntri ka Tnad Sports and Youth Affairs Bah Wailadmiki Shylla ha ka sngi Thohdieng, ula pynpaw ia ka jingsngewskhem ba ka jingpynkhreh ia ka bynta ka National Games ka la la iaid ha ka lynti kaba dei bad baroh ki kam kiba dang sahteng, la khmih lynti ban pyndep hapoh ka por kaba la buh.
U Myntri ula ong, ba u Myntri ka Sorkar Pdeng dang shen ula lum ia ka jingialang ban khmih bniah ia ka jingiaid ki kam ki jam ha ka jylla.
“Lada phi kynmaw, dang ha kine ki khyndiat taiew, u Myntri ka Sorkar Pdeng uba khmih ia ka kam ialehkai ula wan jngoh bad khmih ia ka rukom pynkhreh. Ula pynpaw ia ka jingsngewhun bad ka jingiaid shakhmat jong ki kam” la ong u Bah Shylla.
Ula kubur ba kila don ki jingpynslem kiba malu mala hynrei ula kyntait pat ba kin dei pat ki jingsngewkhia kiba jur bha.
“Ki don kiba tang katto katne ki projek, hynrei ngi don ka jingngeit kaba skhem ba yn pyndep ia ki ha ka por kaba la buh” la ong u Myntri.
Ban pynthikna ia ka jingiaid ryntih jong ka lympung ialehkai, ka jylla kala thaw ia ka kynhun kaba kyrpang. “Kumba phi tip ngi lah thaw ia ka National Games Society na ka bynta ban iaid ryntih bad ia ka jingpynkhreh” ong u Bah Shylla.
U Myntri ula ong, ba la bthah ia ka tnad ban thaw ia ki committee ha kaban pynbit pynbiang ia ki jingdonkam.
“Nga lah dep bthah ia ka Tnad ban sdang ban thung ia ki ophisar na ka bynta ki committee bapher bapher kaban khmih bniah ia ka jingpynbiang ia ki jaka sah, ka leit ka wan, ka koit ka khiah bad kiwei kiwei ki bynta. Nga lah bthah ia ki ba kin pyndep ia katei ka jingthung hapoh jong ka shi bnai, hadien kane ngan sa khmih bniah biang ia ka jingpynkhreh na ka bynta ka National Games” ula ong.
