Guwahati, K’Lyngkot 06: Ym duna ia ka 13 ngut ki nongtih dewiong la suba ba kila sahkut bad shah taplup ha kawei ka par dewiong, kaba la shlei um ha ka District Dima Hasao jong ka Jylla Assam naduh ka por 7 baje mynstep jong ka 6 tarik Kyllalyngkot.
La ïathuh ba kane ka jingjia kala jia ha krem dewïong No. 19 ha Tin Kilo kaba hap hapoh ka Umrangso police station.
La ïathuh ba ki don 27 ngut ki nongtih dewiong kiba la sahkut hapoh katei ka par dewiong hynrei 10 ngut ki la lah ban phet krad bad haduh mynta ki don hapdeng 13 haduh 17 ngut ki bym shym la lap satia.
Haduh mynta kam pat don kano kano ka jingpynthikna kaba thikna halor kane ka jingjia hynrei u heh jong ka District Disaster Management Authority (DDMA) u la kam ba u la ïoh ïa ki khubor halor kane ka jingjia ba sngewsih.
“La pyntip ia ngi shaphang ki nongtrei kiba sahkut ha katei ka par dewiong hynrei ia ka kaiphod ym pat lah ban pynshisha. U Deputy Commissioner jong ngi u dang leit jngoh ïa katei ka jaka, bad lada lah ban pynthikna, yn sa sdang mardor ïa ki kam ban pynlait im iaki ba sahkut” ong u heh Sorkar.
Ki khubor ki pyni ba katei ka par dewiong ka duna ïa ki jingdonkam ba kongsan bad ha ki dur video ba la ïasam bad ki bor Sorkar ki pynskhem ïa kine ki jingkynnoh.
Ki jingsngewkhia ki nang jur halor ka jingtreikam be-aiñ iaka par dewiong bad la kynnoh ba kane ka krem dewiong ka treikam hapoh ka jingïada jong ki riew saiñ pyrthei bad ki bor Sorkar khlem da don ki lad jingïada iaki nongtrei.
Ki bahaïing hasem jong ki nongtih dewiong kiba dang sahkit ki dang ap khmih lynti da ka jingsngewkhia ïa kane khubor.
Haba pynpaw iaka jingsngewsih halor kane, uwei u bahaïing u la ong “Nga la wan shane hadien ba nga la ïohsngew na ka khun jong nga ba u tnga jong ka u la shah teh ha ka par dewiong. Ngam tip katno ngut ki briew kiba la shah tep, hynrei nga tip ba u don hapdeng jong ki”.
Ka jingbym don ki lad jingïada bad ka jingkynnoh ba ka jingtih dewiong ka long be-aiñ ka la pynjur ïa ka jingeh jong ka jinglong jingman, kaba la pynmih ïa ka jingbitar jong ki paidbah.
Ki bor Sorkar ki ialeh katba lah ban pynstet iaki kam ban pynlait im iaki lanot ba shah tep.
