Shillong Risaw 2: Ki jingkynnoh ba ka BJP kan khang khyrdep ïa ki ïingmane bad ban khang ïa ka doh masi kim dei eiei hynrei ki jingkynnoh ha ka por elekshon ba la pynsaphriang da ki liang pyrshah kiba pynsheptieng ïa u Myntri Rangbahduh ka ri u Narendra Modi, ong u Myntri Sorkar ka jylla uba dei ruh u MLA ka South Shillong u Bah Sanbor Shullai ha ka sngi Thohdieng.
Ia kane u Bah Sanbor Shullai u la kren ha kawei na ka jingialang jong ka BJP Mawlai Mandal ha Mawlai Umthlong ban kitbok kitrwiiang ia saw ngut ki ban iakhun ha ka World Armwrestling Championship ha Delhi ba kynthup ia u Bah Alex Shonroy Mylliem Umlong, ka Nerisa Kharphuri, u Borsis Nongbri bad ka Bandarika Kharkongor.
Da kaba kitbok kitrwiang ïa ki nongïalehkai, u Shullai u la pynbna ïa ka jingïarap kaba T.1 lak, kata T.25 hajar marwei ban pyllait hadien ka 5 tarik u Lber, na ka scheme MLA grant jong u nalor ba u la synniang 10 hajar ha kane ka sngi.
U la ong ba 80 percent na ki nongkitkam jong u ha South Shillong Mandal ki dei ki Khristan bad 90 percent ki Khristan ha Laban ki vote ia ka BJP.
“Ha ka por u Bah Thranghok ki ong ba lada jop ka BJP kan khang khyrdep ia ki iingmane, yn khang ia ka doh masi.Hato ka la jia kumta? Ha ka por elekshon jong nga ki ong ba u Sanbor un thang ia ki iingmane bad phah ia ki runar ban peit ia ki fridge.Hato phi la iohsngew ba nga la shah kem namar ba nga la thang ia ka iingmane?” ong u Bah Shullai.
“Kine ki dei ki buit ba la leh 2-3 bnai shwa ka elekshon.Ha ki 10 snem jong ka sorkar u Modi, ki shnong ki la ioh ia ka bording, ka um, u khaw khlem jingsiew, ka gas, ki dawai Covid bad ki skhim nongrep.Baroh ki ieng lain ban shim ia ki skhim jong u Modi, hynrei haba iadei bad ka BJP, ki pynphriang ia ki khubor lamler,” u la ong.
“Dei na kata ka daw ba nga ong, haba phi pdiang ia ki skhim jong u Modi, pdiang ruh ia ka BJP.Wat ngeit ia ki jingpynbna lamler,” u la bynrap.
U Bah Shullai u la kam ba ka jingtrei jong u ha Laban ka kren hi.
“Mynshwa ki briew ki hap ban thied ia ka um, mynta la don baroh 24 kynta.Ki surok ki la poi sha man la ki ïing ki sem.La sawphew snem lai tylli ki Dorbar Shnong ha Lumparing ki la ap ban ïoh ïa ka surok.Hadien ba nga la shna ïa ka, ki la ai kyrteng ïa ka da ka Sanbor Shullai road,” u la ong.
U la ïaroh ruh ïa ki nong Mawlai kiba la rung sha ka BJP, da kaba ong ba palat 200 ngut ki briew ki la rung lai bnai mynshwa hapoh ka jingialam u Bah Synshar Maiong bad sa 200 ngut na Jaiñtia Hills dang shen kila rung.
“Ki briew mynta ki la long kiba stad bad kiba iohi jngai.Kim pdiang shuh ia ki jingthok ba ialam bakla pyrshah ia ka BJP,” u la ong.
Halor ka jingkyrpad na u Assistant Rangbah Shnong, u bah Shullai u la ong ba watla u dei u MLA ka South Shillong hynrei u trei na ka bynta ka jylla Meghalaya baroh kawei.
