Nongstoin, Risaw 02: Ka All Lyngngam Organisation (ALO) ha ka sngi thohdieng, ka la ujor ejahar ha Nongstoiñ Police Station pyrshah ïa ki ar ngut ki briew kiba kynthoh ha ki rynsan social media ba ki Lyngngam ki dei nongbam doh briew.
Kane ka seng hapoh ka jingïalam u President Dr. Bostick Mawsow, kala jer kyrteng ha kane ka ejahar ia u Melansius Sangriang bad u Mikil Wahlang, kiba la kynthoh lyngba ki rynsan social media ïa ka jaidbynriew Lyngngam da kaba kynnoh ba ki Lyngngam ki dei ki nongbam briew.
Kane ka jingkynthoh kala mih hadien ka jingjia shah pyniap ki shikurim kaba la jia ha kine ki sngi bala leit ha Nongjri kumba la paw ha ki lad pathai khubor.
Ka seng ka la pynpaw ïa ka jingsngewlem bad ka jingsngewsih kaba jur ïa kaei kaba la jia ïa ki shijur kiba la shah pynïap ha ka thaiñ Nongjri.
“Hynrei, ban kynthoh ïa ka thaiñ bad ïa ka jaidbynriew baroh kawei, ka long ka bym lah ban pdiang, namar kane ka wanrah ïa ka jingïasngewpher thaiñ bad ka sngewpher jaidbynriew. Kumta khnang ba nangne shakhmat kum kitei ki briew kin ym mlien shuh ka seng ka la ai shi syndon da ka ejahar” kala ong.
U samla Bendrowell Hashah kum General Secretary, u la ong ba ka jingkynthoh jong kitei ki briew ka dei ka jingthmu ban pynïashrut para marjan bad ban pharia ïa ka jaidbynriew Hynniewtrep, na kata ka daw ym banse ban ai jingsneng ia kitei ki baroh arngut ka seng ka hap ujor ejahar.
