Shillong, Risaw : Ka Mawlai SC ka la lah ba kan pynliem ia ka Sawmer SC da 2-1, bad lyngba kane ka jingjop lah ruh ban ong ba kan don biang ha ka thong ban iaknieh rah ia ka nam lahduh jong ka Shillong Premier League 2026.
Ia ki kol na bynta ka Mawlai SC la thep ia ki lyngba u Damanbhalang Chyne (45’+1) bad na u Jestibor Mawlong (76’), katba ia ka shi kol na bynta ka Sawmer SC la thep ia ka da u Orestar Sad (62’).
Kaba pynitynnad ia kane ka jingiakhun ka long ba ka Sawmer SC ka laieng iakhun tad haduh kaba kut jong kane ka jingiakhun, ia kaba ka Mawlai SC ka la lah ba kan shan tyngeh bad ba kan wnphai na madan bad ka jingjop.
Kumba la ap khmih lynti marsien ia sdang, ka jingiakhun ka long kaba shongshit bad itynnad bha, ha kaba u Lovingstar Suting u la ioh ban khyrwit jam ia ka bol, ia kaba la lah ban kyrda ia ka da u rang ap kol ka Sawmer, u Urbanity Makhroh bad kane ka la jia tang hapoh shim minit ba la sdang ka jingiakhun.
Advertisement
Hadien kumba 10 minit, ki rang ialehkai ka Mawlai ki la kyrpad na u referee hadien ba u Damanbhalang u la tyllun khru ru khru ha kut jong ka box, hynrei u bah Hopewelson Hujon kum u referee um shim la I don don dak eiei ia ka rukom knieh u Khrwkupar Tamu ia kane ka bol. Hynrei ka Mawlai ka iai bteng ban nion borbah, kampher wat lada kim shim la lah than eh ban pynher sted ia ka rukom ialehkai ka jong ki, kumba ka la long na ka jingiakhun ba la dep.
Ha ka minit ba ka jingiakhun kan khreh jam sha ka jingiashong thait, ka Mawlai lyngba u Damanbhalang, ka la ioh ba kan pynkhih ia ka jar kaba la wan naka jingbakla pynbuh bol na shiteng mdan ka Sawmer, ha kaba u Ricky Chyne u la ioh ban tehlakam ia kane ka bol ne wat ba un da lah hi ruh ba un thep ia ka kol, hynrei ban pyntikna ia ka kabu ba kan nym leh nohei, tiak u la pyllait sha u Daman uba la leh beit ia kaei kaba donkam.
Ka kylla miet ka long ba ka Mawlai wat ka la tam lypa shakhmat da shi kol, hynrei ka rukom ialehkai jong ka, I kumba ka kyiuh bha, kaba hangne u Wanshwa ha ka jingkyrkieh u la kum bakla ban pashat ia ka bol sha u Bickyson Kharkongor uba marsien ia ioh dain u la shut jam bha, kaba pynlong ia u Lambhamiki Lamare ba un hap ban ialeh ban ioh tare iaka bol kaba la poi sha ka corner.
Advertisement
Ynda haba ka jingiakhun ka la jam sha ka shi kynta tam ba ka Sawmer ka la ioh ia ka kabu ban pynkhih ia ka jar kaba la wan lyngba u Orester, kaba pynlong pat ia ka Mawlai ba kan dei ka sien kaba kaba ar ba kan shah pynkhih ka jar ka jong ka ha kane ka samoi ialehkai ba mynta.
Ka jingshah pynphai kane ka shi kol, ka la pynkhynniuh hi ir ia ka kynhun ka Mawlai, ia kaba hap pat ban ainam ai burom ia ka jinglong ba kloi, len lade ki player ha madan, ha kaba ki iai trei shitom bad minot ban shna pynwandur ia ki bol ba ki ioh ban tehlakam, kaba la siewspah pat ia kane ka mynsiem iakhun ka jong ki ha ka minit ba 76 lyngba u Jestibor.
Ha kaba kut lehse kan nym da long than eh ka jingjop kaban pynhun jrut ia ka mynsiem ka Mawlai, ia kaba kin hap pat ban pdiang ia kaei kaba ki la pyrshang bad trei shitom pat ha madan, da kaba mynta kaba sah pat ka long ban phai khmat sha ka jingiakhun kaban wan pyrshah ia ka Rangdajied United.
Ha kaba kut ka kylla iakhun ba phra, ka Mawlai joit kan lap biang ia ka dien trai ka jong ka ban don biang sha ka thong iakhun bad ka thong ia ki ban rah ia ka nam lahduh kan shong na ka jingiakhun pyrshah ia ka Rangdajied, namar kumba ka long ia mynta haba khmih sha ka miej iakhein point, ka Mawlai ka la khur 18, bud sa ka Shillong Lajong 17, Langsning 16, Nongkseh 13 point.
Lashai pat ka sngi, ka Nongkseh SSCC kan mih madan ban iakhun pyrshah ia ka Laitkor SC, kaba la buh ban long ha ka por 3 baje nohphai sngi.
