Nongpoh, K’lyngkot 06: U MP ka Rajya Sabha Dr W.R Kharlukhi hynne ka sngi Nyngkong, ula plie paidbah ia artylli ki surok ha Ri-Bhoi District kiba la pyntrei ha ka jinglut ba kot T. 1.37 klur.
Kine ki surok ki kynthup ia ka surok Umiarong sha Lawbyrwa ba pyniasoh ia ka surok Sumer sha Kyrdemkulai ha ka jing jrong ba 750 meter bad ka surok kaba pyniasoh ia ka Lawbyrwa sha ka dong Mawnai kaba jrong kumba 585 meter.
Kine ki surok ki dei kiba hap hapoh ka PWD Umsning Division.
Haba ai jingkren ha ka jingialang, u Dr Kharlukhi ula pynpaw ia ka jingkmen ban iohi ia ka jingurlong ki jingphohsniew bad ki jingangnud jong ki paidbah ka thain ban ioh ia kine ki surok, ki ban long u budlum ka roi ka par jong ka thain.
Ula ong ba kum u Nongmihkhmat paidbah, ka dei eh ia ki ban treishitom ha ka ban wanrah ia ki kam pynroi bapher bapheer sha ki shnong ki thaw hapoh ka Jylla khamtam eh ban pynioh ia ki lad pyniasoh kum ki surok.
Kiba la iadonlang ha kane ka sngi ki kynthup ia u Bah R. Kharkrang, Rangbah shnong Lawbyrwa, Bah D. Laloo, Executive Engineer, PWD Roads, Umsning Division, u Dr. C.R. Lyngdoh, Co-Chairman of Meghalaya Infra-tech Consultancy & Innovations Limited lem bad kiwei kiwei.
