Shillong, Nailar 24 : Haba shim ia ki jingjia kam thombor ba 19 tarik Nailar kum ka jingjia kaba sngewsih shibun, u Myntri Rangbah Conrad K Sangma ha ka sngi Nyngkong ula ban jur ba ka Sorkar kan leh tyngeh pyrshah ia kito kiba pyrshang ban pynrung ia ka jingtieng jingsmiej hapdeng ki paid nongshongshnong.
“Kaei kaei kaba jia ka long kaba sngewsih. Ki don ki briew kiba pyrshang ban pynrung ia ka jingtieng jingsmiej ha ka imlang sahlang bad ngin ym map satia ia ki. Ngin sa leh da kaba tyngeh ia kito kiba pyrshang ban pyntieng ia u paidbah. Ki nongshongshnong jongngi kim dei ban khuslai” ong u Conrad.
U Myntri Rangbah ula kubur ba ki paidbah kila mad ia ki jingeh hadien katei ka jingjia namar ka jingpynphai kylliang na ka Jylla ba marjan.
“Ki paidbah kila mad ia katto katne ki jingeh, ngi mynjur ia kane namar ka jingleh markyllang kaba ngi ioh na ka Jylla ba marjan. Ia kane hap ban tehlakam, iakren bad iapynbeit. Mynta ba ngi la dep leh ia kine kiei kiei baroh, ngi dei ban jam ha ka lynti kaba tei” ula ong.
Haba khot ia ka jingshim lang ia ka jingkitkhlieh, u Conrad ula ong ba ka hok ban iakhih ba jai jai kam dei ia kabna pyndon kam bakla ha kaban shim ia ka ain hala ka jong ka kti.
“Ym tang ka Sorkar hynrei ngi baroh, kynthup ki Seng bapher bapher, ki dei ban ioh jinghikai bad pynthikna ba kin shim ia ki sienjam ha ki sngi ban wan khnang ba watla ngi ioh ia ka hok ban iakhih jai jai, kam mut pat ba phin shim ia ka ain hala ka jong ka kti. Khamtam ban shoh bad buh jingma ia kiba lui lui-ka khubor ka dei ban leit sha baroh na ngi halor kane ka bynta” ula ong.
“Ka imlang sahlang ka dei ruh ban mih shisien ban kren halor kane ka bynta” ula bynrap.
Haba pynpaw ba ka Sorkar jong u ka long kaba kloi ban iakren, u Myntri Rangbah ula maham ba ia u lain ym dei ban tam.
“Ngi dei kawei na ka Sorkar kaba pdiang ia baroh. Ngi la plie ia ka jingkhang ban iakren ia kino kino ki ishu. Hynrei u don u lain ba ngi hap ban buh bad ym don mano mano ruh ba lah ban tam. Kane ka dei ka khubor ia baroh – sngewbha wat pyrshang ban leh ia kata, bad lada don kiba leh, ngin hap ban leh eiei kat kum ka ain” ula ong.
Halor ka jingsngewkhia ia ka jingwan ki nongjngohkai, u Conrad ula kubur ba ka jingsniew ka suk ka sain ka ktah ia ki paidbah hynrei ka Sorkar kala shim mar mar ia ki sienjam ban tehlakam.
