Shillong, Nailar 24: U Nongialam ka Liang Pyrshah Mukul Sangma ha ka sngi Nyngkong ula dawa ba dei ban rejistar ia ki ejahar pyrshah ia ki kynhun ki bym don jingiadei bad ka sorkar (non state actors), kiba donkti ha kaban khang bad pynthud ia ka leit ka wan jong ki kali kiba kit ia ki mar kiba kongsan, hadien ba jia ki kam thombor ha ka 19 tarik u Nailar haba maham ba kane ka rukom leh kadei kaba buh ha ka jingma ia ka jylla.
Haba kren hapoh ka iingdorbar tahwain u Sangma ula ong “Ngi lah sakhi ia ka jingjia kabym shim poi pyrkhat kaba la mih ha ka 19 tarik u Nailar ha kaba ki paitbah ka jylla hi kila mad ia ki jingeh kaba khraw ”.
“Kumno ka jylla kala shah thombor bad don hapdeng ka jingma kaba khraw, ha ki kynhun bad kumno ka jingshalan ia ki mar ki mata kiba kongsan kala shah pyndik, kane kadei kaei kaei kaba sngewkhia bha. Ngi kwah ban tip, kiei ki sienjam kiba ka sorkar kala shim bad kumno ia kum kitei ki jait jingjia dei ban tehlakam ha ki por kiban wan bad kumno yn leh kat kum ka ain ia ki kynhun ba donkti khnang ba ka jylla kan ym shah thombor ha kano kano ka por” ula bynrap.
Hadien ba u Myntri Rangbah ka Jylla u Conrad K Sangma ula wanrah ia ka ‘Suo Motu Statement’ halor katei ka jingjia, u Nongialam ka Liang Pyrshah ula dawa ba dei ban leh da kaba tyngeh ia kiba pynthut ia ka jingiaid ki kali kit mar katkum ki kyndon jong ka aiñ.
“Kiei kiei ki sienjam kiba la shim da ka Sorkar Jylla kadei kaba hap ban ai jingiaroh hynrei ka jingshisha ka long ba um don uno uno ruh uba don ia ka hok ban thombor bad buh hapdeng ka jingma ia ka jylla bad ban pynthud ia ka jingpynpoi ia ki mar kiba kongsan. Hato ka Sorkar ka lah ujor da ka ejahar pyrshah ia kito ki kynhun kiba khang ia ka surok?” buh jingkylli u Mukul Sangma.
“Ngi dei ban don ia ka bor ban sngewthuh lypa pyrshah ia kitei ki jingjia kiba pynlehrain ia ka jylla, namar ba kine ki long kiba ma bha ia ka jylla. Nga kyrpad ba dei ban shimkhi ban ithuh ia kine. Nga dawa ba dei ban ujor da ka ejahar pyrshah ia kito ki kynhun kiba la thombor bad buh hapdeng ka jingeh ia ka jylla, khamtam eh ha kaban pynthud ia ka kit ka bah ia ki mar kiba kongsan. Lem kumta, lada ngim leh eiei, ngin sa iohi biang ia kum kine ki tamasa na ka por sha ka por” ula ong.
Hadien ba kylli halor kitei ki jingdawa, u Myntri Rangbah u Conrad K Sangma ula ong, “Ngi dang tohkit ha baroh ki liang bad ngim shim la pynkut noh ia kino kino ki bynta”.
